Qazaqstannyń Halyq ártisi, tanymal akter ári rejisser Doshan Joljaqsynov 75 jasqa tolǵan mereitoiyn Almatyda atap ótti. Saltanatty keshke elimizdiń óner, saiasat jáne biznes salasyndaǵy belgili tulǵalary jinalǵan. Áleýmettik jelide mereitoidan túsirilgen sýretter men videolar keńinen tarady, dep habarlaidy ult.kz.
Mereitoiǵa jinalǵan qonaqtardyń arasynda Qazaqstannyń Reseidegi burynǵy elshisi Imanǵali Tasmaǵambetov, burynǵy memlekettik hatshy Qyrymbek Kósherbaev, aǵaiyndy Nyǵmatýlinder, burynǵy memlekettik qyzmetkerler Tamara Dúisenova, Darhan Qaletaev, Qýanysh Sultanov jáne Almaty oblysynyń burynǵy ákimi Amandyq Batalov bolǵany habarlandy.
Jelide taraǵan málimetterge súiensek, merekelik keshte alǵashqy quttyqtaý sóz Imanǵali Tasmaǵambetovke berilgen. Qonaqtar mereitoi iesiniń qazaq kinosy men teatr ónerine qosqan úlesin atap ótip, jyly lebizderin bildirgen.
Mereitoidan keiin Doshan Joljaqsynovtyń jary Qaragóz Súleimenova áleýmettik jelidegi paraqshasynda keshten túsirilgen sýretterdi jariialap, qýanyshtaryn bólisýge kelgen qonaqtarǵa alǵys bildirdi.
"Keshegi keshtiń jylýy áli de júrekte... Doshannyń 75 jyldyq mereitoiynda janymyzdan tabylyp, qýanyshymyzdy birge bólisken barsha qonaqtarǵa shyn júrekten alǵys aitamyn. Jyly lebizderińiz, aq tilekterińiz, yqylastaryńyz ben qurmetterińiz bul keshti biz úshin odan saiyn qymbat etti. Osyndai sátterde qasyńda júrgen adamdardyń qadirin erekshe sezinesiń", – dep jazdy Qaragóz Súleimenova.
Osylaisha, Doshan Joljaqsynovtyń 75 jyldyq mereitoiy óner men qoǵam qairatkerleriniń basyn qosqan aitýly keshterdiń birine ainaldy.
Doshan Joljaqsynov kim?
Doshan Qaliuly Joljaqsynov – Qazaqstannyń Halyq ártisi, belgili teatr jáne kino akteri, rejisser ári ánshi. Ol 1951 jyly 7 qazanda Shyǵys Qazaqstan oblysy Kúrshim aýdanynyń Balyqshy aýylynda dúniege kelgen. 2026 jyly óner iesi 75 jasqa toldy. Bolashaq akter 1969 jyly Qurmanǵazy atyndaǵy óner institýtynyń teatr fakýltetine túsip, KSRO Halyq ártisi Hadisha Bókeevanyń sheberhanasynda bilim alǵan.
Eńbek jolyn Ǵabit Músirepov atyndaǵy balalar men jasóspirimder teatrynda bastap, keiin osy óner ordasynyń direktory ári kórkemdik jetekshisi qyzmetin atqarǵan. Shyǵarmashylyq ǵumyrynda teatr sahnasy men kinoda 200-den astam keiipkerdi somdaǵan. Ol "Gaýhartas" filmindegi Áskerbek róli arqyly qalyń kórermenge keńinen tanyldy. Sondai-aq "Daladaǵy qýǵyn", "Altyn kúz", "Ompa", "Aq barystyń urpaqtary" jáne "Kóshpendiler" filmderinde oinaǵan. Akterlik qyzmetimen qatar rejisserlik ónerdi de meńgerip, tarihi tulǵalardyń ómirin ekranǵa shyǵarýǵa den qoidy.
2009 jyly qazaqtyń áigili ánshisine arnalǵan "Birjan sal" kórkem filmin túsirdi. Al 2015 jyly Abaidyń ákesi Qunanbai Óskenbaiulynyń ómirin baiandaityn "Qunanbai" tarihi filminiń rejisseri ári basty róldi oryndaýshysy boldy. Bul týyndy qazaq kino ónerindegi mańyzdy tarihi jobalardyń biri retinde tanyldy. Doshan Joljaqsynov 1995 jyly Qazaqstannyń Halyq ártisi ataǵyn alyp, 1996 jyly Qyrǵyzstannyń eńbek sińirgen ártisi atandy. Sondai-aq ol 1996 jáne 2016 jyldary Qazaqstan Respýblikasynyń Memlekettik syilyǵyna ie boldy. Óner salasyndaǵy eńbegi úshin "Qurmet" jáne "Otan" ordenderimen marapattalǵan.
