Úkimettiń búgingi otyrysynda QR Indýstriia jáne infraqurylymdyq damý ministri Qaiyrbek Óskenbaev jappai tártipsizdikter kezinde buzylǵan obektilerdi qalpyna keltirý sharalary týraly málimet berdi, dep habarlady QazAqparat.
«Ákimdikterdiń jedel derekteri boiynsha el boiynsha 8 óńirde 53 memlekettik nysan jáne 151 shaǵyn jáne orta kásipkerlik nysany zardap shekti. Ákimdikter búlingen nysandardyń naqty sanyn kún saiyn jańartyp otyrady», - degen ministr memlekettik komissiia bul másele boiynsha biryńǵai qadamdyq is-qimyl algoritmin ázirlegenin jáne obektilerdi qalpyna keltirý boiynsha naqty merzimder belgilengenin atady.
«Barlyq óńirlerde keltirilgen zalaldy tekserý jáne baǵalaý jónindegi tiisti komissiialar quryldy.
Búgingi tańda aqaý týraly aktiler jasalyp, tehnikalyq tekserý júrgizilýde. Keiin jedel tártipte kúrdeli jóndeý jáne qaita qurý boiynsha jobalyq-smetalyq qujattama ázirlenedi.
Qalpyna keltirý jumystaryn biýdjetten qarjylandyrý úshin ministrlik ákimdikter jetkizgen tizbe boiynsha qajetti qujattamany jinaidy», - dedi Qaiyrbek Óskenbaev.
