QR Bas prokýrorynyń aǵa kómekshisi Azamat Sarǵazin tótenshe jaǵdai rejiminen keiin eldegi quqyqtyq tártipti qalpyna keltirý sharalary qandai ustanymǵa negizdelgenin túsindirdi, dep habarlaidy QazAqparat.
«Osy oqiǵalar kezinde Memleket basshysy da halyqqa úndeý jasai otyryp, parasattylyq tanytýǵa jáne arandaýǵa berilmeýge shaqyrdy. Ókinishke qarai, kei azamattar zańsyz áreketterge jol bermeý bóligindegi barlyq úndeýlerdi elemedi. Bastapqyda beibit jiyn ótkizýdiń zańmen belgilengen tártibi buzylǵan bolatyn. Osyǵan qaramastan, narazylyq aktsiialary beibit sipatta bolǵandyqtan, buzýshylarǵa shara qoldanylǵan joq. Qaraqshylar jaǵdaidy paidalanyp, qylmys jasai bastady. Kúsh pen qarý qoldandy, buǵan basqalardy shaqyrdy. Ǵimarattar men kólikterdi basyp alyp, órtedi, adamdardy óltirdi», - dep eske aldy Bas prokýrordyń aǵa kómekshisi.
Onyń aitýyna qaraǵanda, ereýilde júrgenderdi ustaý osy kezden bastalǵan.
«Osydan keiin qoǵamdyq tártipti qamtamasyz etý jáne qylmystyń jolyn kesý maqsatynda tártip buzýshylar ustalyp, politsiiaǵa jetkizildi. Olardyń áreketiniń sipatyna jáne ákep soqqan saldaryna bailanysty ákimshilik jaýapqa tartyldy nemese qylmystyq isterdiń figýranty boldy. Bas prokýratýra osy ustanymǵa súiene otyryp, zańdylyq pen quqyqtyq tártipti qamtamasyz etý úshin odan ári de sharalar qabyldaidy. Bul rette árbir quqyq buzýshynyń is-áreketi obektivti jáne muqiiat tekserilip, jaýapkershilik sharalary jasalǵan quqyqbuzýshylyqtyń sipaty men kinálilerdiń jeke basy eskerile otyryp qabyldanady. Memleket basshysy Bas prokýratýraǵa osy kúnderi ártúrli quqyq buzýshylyqtar úshin ustalǵan adamdardyń kiná dárejesin anyqtap, aýyrlatatyn mán-jai bolmaǵan jaǵdaida jazany jeńildetýdi tapsyrdy», - dedi Azamat Sarǵazin.
