Karateden Qazaqstan komandasynyń múshesi Darhan Asadilov 2020 jylǵy Tokio Olimpiadasyna joldama aldy, dep habarlaidy "Ult aqparat".
QR Ulttyq olimpiadalyq komitet habarlaǵandai, 67 kelige deiingi birikken salmaq dárejesinde synǵa túsetin Darhan Olimpiada oiyndaryna merziminen buryn litsenziia utyp aldy.
«Tórtjyldyq dodasyna irikteý kezeńiniń aiaqtalýyna áli úsh aidai ýaqyt pen birneshe iri jarystyń baryna qaramastan, D.Asadilov Tokio Olimpiadasyna qatysý múmkindigin ielenip otyr. Sebebi, olimpiadalyq reitingtiń kósh basynda kele jatqan Darhandy jaqyn arada eshkim qýyp jete almaidy. Bul týraly Dýbaida ótken finaldyq kezeńnen keiin belgili boldy», - delingen habarlamada.
Irikteý kezeńiniń erejesine sáikes, reitingte alǵashqy eki oryndy ielengen sportshylar tikelei Tokio Olimpiadasyna litsenziia alady. Darhan Asadilov ótken jyly bastalǵan irikteý básekeleriniń basym kópshiliginde jeńiske jetken.
Atap aitar bolsaq, Qazaqstan komandasynyń úzdigi 11 premer-liga kezeńiniń segizinde jeńiske jetken. Osylaisha, ol júzden asa elden qatysqan 600 sportshynyń ishinen kósh bastap otyr. Asadilov 67 kelige deiingi birikken salmaq dárejesindegi olimpiadalyq reiting tizginin ótken jyldyń shildesinen beri eshkimge ustatpaǵan.
Qazirgi sátte Darhannyń enshisinde 9817.5 upai bar. Al onyń izin basyp kele jatqan italiialyq Andjelo Krechenzoda - 7350, túrkiialyq Samdan Eraida 6772.5 upai bar. Irikteý kezeńindegi qalǵan týrnirler Darhan úshin sátsiz aiaqtalǵannyń ózinde, qarsylastardyń qýyp jetýi neǵaibyl. Óitkeni, Asadilov basty qarsylastarynan qara úzip ketken.
Karateniń Olimpiada baǵdarlamasyna alǵash ret engizilip otyrǵanyn eskersek, Darhannyń bul jetistigi tarihta qalatyny sózsiz.
Aita ketelik, ázirge Qazaqstan qorjynynda sporttyń 15 túrinen 29 joldama bar.
