Tarbaǵatai memlekettik ulttyq tabiǵi parkiniń mamandary ǵylymi zertteý júrgizý kezinde fotoqaqpannyń kómegimen janýarlardyń jańa túrleri – amerikalyq sarykúzen men qarakúzendi anyqtaǵan.
Bul týraly Facebook-tegi paraqshasynda QR QR EGTRM Orman sharýashylyǵy komitetiniń baspasóz hatshysy Sáken Dildahmet habarlady.
Amerikalyq qarakúzen – aqqulaq pen kúzen tuqymdastarynyń bir túri. Kúzender men aqqisterden taraǵan derbes tuqymdas ókili de bolýy múmkin. Onyń dene bitimi ortasha: atalyqtarynyń salmaǵy 0,5 kg - 1,5 kg, analyqtary 0,4 kg - 0,8 kg, atalyqtarynyń dene uzyndyǵy - 34-45 sm, analyqtary - 31-37,5 sm, atalyqtarynyń quiryǵy
15,6-24,7 sm, analyqtarynyń quiryǵy 14,8-21,5 sm.
Bul janýar qarakúzenge uqsaidy, denesi uzyn, aiaqtary qysqa. Terisiniń túsi qara qońyr, astyńǵy erininde, tamaǵy men qarnynda túrli kólemdegi aq tústi daqtar jii kezdesedi.
Taralý aimaǵy – Coltústik Amerika. Eýraziiaǵa da beiimdelgen. Burynǵy KSRO aýmaǵyna beiimdelýi 1933 jyly bastaldy. Sýy tushy sý qoimalary, kólderdi mekendeidi. Poligam. Kóbine jalǵyz turady. Sý mańyn mekendeitin janýarlar, soqyrtyshqan, baqa, shaian, usaq balyq jáne sý jándikterimen qorektenedi.
Sarykúzen – aqqulaq pen kúzen tuqymdastarynyń bir túri. Keide japondyq sarykúzen basqa túr retinde erekshelenedi. Kólemi ortasha: atalyqtarynyń salmaǵy 0,65-0,82 kg, analyqtarynyń massasy 0,36-0,43 kg, atalyqtarynyń dene uzyndyǵy 28-39 sm, analyqtarynyń uzyndyǵy 25-30,5 sm, atalyqtarynyń quiryǵy - 15,5-21 sm, analyqtardiki - 13,3-16,4 sm.
Janýar sýsarǵa uqsas, denesi uzyn, aiaqtary qysqa. Terisi bir tústi, sary-jiren.
Ońtústik-shyǵys, Shyǵys jáne Ortalyq Aziiada taraǵan. TMD-da Sibirdiń Ońtústik jáne ortalyq beldeýinde jáne eldiń eýropalyq bóliginiń qiyr shyǵysynda mekendeidi. Kariotipinde 38 hromosoma bar.
Túrli jerlerdi mekendeidi, ásirese ózen jáne bulaq alqaptaryn unatady. Poligam. Kóbine jalǵyz júredi. Ózin jii qýalaityn bulǵynmen araz. Ortasha jáne usaq tyshqan tárizdi kemirgishter, usaq qustar, qaraǵai jańǵaqtarymen qorektenedi.
Tarbaǵatai ulttyq parki 2018 jyly quryldy. Ulttyq parkti omyrtqaly janýarlardyń 376 túri, sonyń ishinde balyqtyń 19 túri, qosmekendilerdiń eki túri, baýyrymen jorǵalaýshylardyń 23 túri, qustardyń 272 túri, sútqorekti haiýandardyń 60 túri mekendeidi.
