Tarazda jyr alyby – Jambyl Jabaevtiń 175 jyldyq mereitoiyna orai respýblikalyq aitys bastaldy, dep habarlaidy "Ult aqparat".
Bul kúngi sharalar tańerteńmen aqynnyń Tarazdaǵy eskertkishine gúl shoqtaryn qoiý rásiminen bastaldy. Oǵan oblys ákimi, qoǵam qairatkerleri, ziialy qaýym ókilderi men mádeniet salasynyń maitalmandary qatysty.
Budan soń «Balasaǵun» ortalyq kontsert zalynda «Jambyl – meniń jai atym, halyq – meniń shyn atym» atty respýblikalyq aitys bastaldy. Sóz barymtasyna barlyǵy elimizdiń ár óńirinen 20 aqyn 10 jup boiynsha qatysýda. Sóz saiys onlain formatta ótýde.
Alǵashqy jup bolyp jambyldyq Aitmuhanbet Isaqov pen qostanailyq aitys aqtańgeri Aibek Qaliev shappa-shapqa tústi.
Aitysty aqyn, elimizdiń Eńbek sińirgen qairatkeri, «Parasat» ordeniniń iegeri Júrsin Erman júrgizýde. Qazylar qataryndaǵy Qazaqstannyń halyq ártisi Asanáli Áshimov, Memleket jáne qoǵam qairatkeri Myrzatai Joldasbekov, ánshi-kompozitor, Qazaqstannyń halyq ártisi Altynbek Qorazbaev, Qazaqstannyń eńbek sińirgen qairatkeri Ǵalym Jailybai bar. Sondai-aq aitysker aqyn, QR Mádeniet salasynyń úzdigi Baýyrjan Haliolla, jýrnalist, oblystyq «Aq jol» gazetiniń bas redaktory Oralhan Dáýit jáne aitysker aqyn, QR Mádeniet salasynyń úzdigi Ahmetjan Ózbekov sóz saiysqa baǵa berýde.
«Biylǵy jyly aldymyzda birqatar mindetter tur. Onyń bastysy el Táýelsizdiginiń 30 jyldyǵy men jyr alyby Jambyl Jabaevtyń 175 jyldyǵyn joǵary deńgeide atap ótý. Asa kórnekti tulǵalardyń mereitoilary men ataýly kúnder – azamattardyń ulttyq jáne tarihi ózindik sanasynyń damýyna eleýli yqpal etetin qoǵamnyń mádeni ómiriniń mańyzdy bóligi»,- dedi oblystyq Mádeniet, arhivter jáne qujattama basqarmasy basshysynyń orynbasary Sara Madieva.
