Tarazda merzimdi qyzmettegi sarbaz áskeri bólimnen qashyp ketti. Túngi kezekshilik kezinde joǵalyp ketken 19 jastaǵy jigitti 4 kúnnen beri izdep jatyr, dep habarlaidy "Ult aqparat" Habar 24 saityna silteme jasap.
Áskerilerdiń aitýynsha, Nurasyl Arysbaev túngi saǵat úsh shamasynda áskeri bólimnen eshkimge eskertpesten óz erkimen ketip qalǵan. Janyndaǵy serigi de baiqamaǵan. Sarbaz áli 6 ai áskeri boryshyn óteýi kerek. Nurasyldyń ketip qalǵanyna áskeriler tańǵalyp otyr. Sebebi, ol basqalarmen qarym-qatynasy jaqsy, sabyrly jigit. Jaýaptylar onyń qolynda qarý joq ekenin málimdedi. Al, sarbazdyń týystary onyń qashyp ketkenine senbeidi.
«Sońǵy ret 20-synda zvondady, "bári jaqsy mama, ýaiymdamańyz" dedi. "Eshkim renjitip jatqan joq pa" dep suradym. "Joq, bári jaqsy, ýaiymdamańyz, balalar da jaqsy, komandirler de jaqsy" dedi», - deidi sarbazdyń anasy Gúljan Arysbaeva.
«Ne sebepten qashyp ketkeni bizge beimálim. Búgingi tańda Jambyl oblysy boiynsha jáne Taraz qalasynda osy áskeri bólimniń qyzmetkerleri jáne quqyq qorǵaý organdary tarapynan Taraz qalasy politsiia basqarmasynyń qyzmetkerleri izdestirý sharalaryn júrgizipjatyr. Ázirge nátije joq», - deidi 8595 áskeri bólimi komandiriniń tárbie jáne ideologiialyq jumystar jónindegi orynbasary Baýyrjan Dúisenbaev.
