Foto: Jazýshylar odaǵy
Taraz qalasynda ekinshi jyl qatarynan uiymdastyrylyp otyrǵan «Asqaq rýhty Áýlieata» atty poeziia keshi men respýblikalyq ádebi-mádeni baiqaýdyń saltanatty marapattaý rásimi joǵary deńgeide ótti, dep habarlaidy Ult.kz.
Eldiń rýhani ómirine serpin bergen bul ádebi basqosý óńirlik jáne respýblikalyq qalamgerlerdiń basyn qosqan mańyzdy mádeni oqiǵaǵa ainaldy.
Biylǵy baiqaýǵa Qazaqstannyń túkpir-túkpirinen 120-dan astam úmitker qatysyp, jeti nominatsiia boiynsha shyǵarmalaryn usyndy. Atap aitqanda, «Proza», «Poeziia», «Ádebi syn», «Dramatýrgiia», «Satira», «Aýdarma», «Balalar ádebieti» baǵyttarynda ótinimder qabyldandy. Sonymen qatar, biyl «Tarazstroi 2004» kompaniiasynyń basshysy Meiirbek Júnisovtiń demeýshiligimen qazaq poeziiasynyń kórnekti ókili Kúlásh Ahmetova atyndaǵy arnaiy júlde taǵaiyndaldy.
Merekelik kesh barysynda Jambyl oblysynyń ákimi Erbol Qarashókeev quttyqtaý sóz sóilep, shyǵarmashylyq joldyń sabyr men tabandylyqty, úzdiksiz izdenis pen biik talpynysty talap etetinin atap ótti. Aimaq basshysy qalamgerlerdiń el rýhaniiatyn baiytýdaǵy róline toqtalyp, ádebiet pen mádenietke kórsetiletin qoldaý aldaǵy ýaqytta da jalǵasyn tabatynyn jetkizdi.
Baiqaý qorytyndysy boiynsha jeńimpazdar tómendegidei anyqtaldy:
– «Proza» nominatsiiasy boiynsha Baýyrjan Momyshuly atyndaǵy júldeni Almaty oblysynan Beibit Sarybai ielendi;
– «Poeziia» nominatsiiasy boiynsha Jambyl Jabaev atyndaǵy júlde Shyǵys Qazaqstan oblysynan Oljas Qasymǵa tabystaldy;
– Nesipbek Dáýtaiuly atyndaǵy «Ádebi syn» nominatsiiasynyń jeńimpazy – Naýryzbek Sarshaev;
– «Dramatýrgiia» nominatsiiasy boiynsha Áldihan Qaldybaev atyndaǵy júldeni astanalyq Marjan Ershý aldy;
– Shona Smahanuly atyndaǵy «Satira» nominatsiiasy boiynsha júlde jambyldyq Nurjan Álishke buiyrdy;
– «Aýdarma» nominatsiiasynda Sherhan Murtaza atyndaǵy júldeni Shymkent qalasynan Arailym Muratalieva jeńip aldy;
– «Balalar ádebieti» nominatsiiasy boiynsha Sovet Álimqulov atyndaǵy júlde jambyldyq Kósemáli Sáttibaiulyna tabystaldy.
Al Kúlásh Ahmetova atyndaǵy arnaiy júldeni Atyraý oblysynan qatysqan Áliia Dáýletbaeva ielendi.
«Asqaq rýhty Áýlieata» poeziia keshi men respýblikalyq ádebi-mádeni baiqaý ulttyq ádebiettiń damýyna serpin berip, jas qalamgerlerdi qoldaýǵa, shyǵarmashylyq áleýetti arttyrýǵa baǵyttalǵan igi bastama retinde el mádenieti tarihynan óz ornyn aiqyndap keledi.
