Taraz mańyndaǵy jarylystardan keiin tonaýshylar jol boiyndaǵy keshendi tonap ketti. Bul týraly "Taý dos" kesheniniń iesi Janna Nazarbekova aitty, - dep habarlaidy Tengrinews.kz.
Keshen jarylys bolǵan áskeri bólimnen 500 metrde bolǵandyqtan, soqqy tolqyny qýatty bolǵan. Mekemede terezeler qirap, shatyr qulaǵan, jihazdar men ydys-aiaq synǵan.
"Bizdiń keshen Taraz qalasynan Almatyǵa shyǵatyn jerde, Batys Eýropa - Batys Qytai tasjoly boiynda ornalasqan. Áskeri bólim keshenniń artynda, bizden 500 metr qashyqta ornalasqan. Byltyr munda Arys qalasynan oq-dáriler jetkizildi", - deidi keshen iesi.
"Taý-dos" qyzmetkerleri áýeli áskeri bólim aýmaǵynda órt shyqqanyn aitty. Órt sóndirýshiler kelip, órtti sóndirýge kirisken. Oq-dári birden jarylǵan joq.
"Kúieýim ekeýmiz ol kezde keshende bolmadyq, biz keshe ǵana emdelýge ketkenbiz. Keshki saǵat 18.00 shamasynda daiarshylar bizge qońyraý shaldy. Olar jumysta júrgende jarylys bolǵan. Alǵashqy tolqyn bolǵanda terezeler synǵan, adamdar qoryqqannan qashyp shyqqan. Jartysy Mihailovkaǵa qashqan, bul jaqyn mańdaǵy aýyl. Keiin qatarynan birneshe jarylys bolǵan. Keshen ishi tolyǵymen qirady. Shatyr, esikter, terezeler - bári jaramsyz. Barlyq múlik búlingen", - deidi keshen iesi.
Tonaýshylar jaǵdaidy paidalanyp, ǵimarattan qundy zattardy, tipti azyq-túlikti de alyp ketken.
"Tonaý túnde bastaldy, túnde olar barlyq bardy, tońazytqyshtardy bosatyp ketken, aqsha da urlandy. Dúkende, kafede, million teńgege jýyq bir kúndik tabys bolǵan. Jumysshylardyń jeke zattary da joǵalyp ketti. Olardyń telefondary, zattary. Barlyq jihaz kóshede jatyr", - deidi Nazarbekova.
Keshen ieleri qazirdiń ózinde politsiiaǵa aryz jazǵan. Olar shyǵyndy áli eseptep úlgermegen. Úi iesiniń aitýynsha, jaqynda ǵana ol bankten nesie alyp, jańa shaihana salǵan, ol da qazir qiraǵan.
"Biz munda áreń jettik. Bizdi kirgizbedi, barlyǵy qorshaýǵa alynǵan. Búgin tańerteń áskeri kiim kigen bir er adamdy ustap aldyq. Bizdiń kózimizshe qymbat alkogoldik sýsyndardy sómkesine salyp alyp barady", - dep ashýlandy keshen iesi.
"Taý Dos" kesheniniń qazirgi kórinisi. Video
Buǵan deiin Jambyl oblysyndaǵy jarylystardan qaza tapqandar sany 9-ǵa jetkeni aitylǵan bolatyn.
Eske salaiyq, Jambyl oblysy Baizaq aýdanynda ornalasqan áskeri bólimde saǵat 19.00 shamasynda qoimalardyń biriniń janynda órt shyqqan. Órt saldarynan anyqtalmaǵan zattar jarylǵan. Jaqyn mańdaǵy turǵyndar evakýatsiialanǵany anyqtaldy.
