Jambyl oblysy ákiminiń ókimimen Qazaqstan Respýblikasy Prezidenti Ákimshiliginiń jáne qalalyq máslihat depýtattarynyń kelisimimen Erjan Jylqybaev Taraz qalasynyń ákimi bolyp taǵaiyndaldy, - dep habarlaidy "Ult aqparat".
Oblys ortalyǵynyń jańa ákimin qala aktivine aimaq basshysy Berdibek Saparbaev tanystyrdy.
«Aitqazy Qarabalaevtyń atqarǵan jumysyna rahmet aitamyn. Taraz oblys ortalyǵy bolǵannan keiin onyń damýy aimaqtyń damýyna tikelei bailanysty. Erjan Jylqybaev biraz jerde qyzmet atqardy, synnan ótti. Tarazdyń damýyna bar tájiribesin salady dep senemin. Eń bastysy, birigip jumys isteý kerek. Taraz mádeni, týrizm ordasy bolýy kerek. Byltyrǵy jyl Qordaiǵa kóp kóńil bólinse, biyl Tarazǵa erekshe nazar aýdarylmaq. Halyqtyń jaǵdaiyn jaqsartý, áleýmettik nysandar salý, infraqurylymdy, kelbetin jaqsartýǵa kóńil bólinedi»,- dep atap ótti Berdibek Saparbaev.
Aitqazy Qarabalaev Taraz jurtyna alǵys bildirdi. Al jańadan taǵaiyndalǵan ákim Erjan Jylqybaev artylǵan senimdi aqtaimyn dep sendirdi.
Erjan Jylqybaev 1982 jyly týǵan, bilimi joǵary.
M. Áýezov atyndaǵy Ońtústik Qazaqstan memlekettik ýniversitetin «Ekonomist-menedjer», QR Prezidenti janyndaǵy memlekettik basqarý akademiiasyn «Memlekettik jáne jergilikti basqarý magistri», S. Amanjolov atyndaǵy Shyǵys Qazaqstan memlekettik ýniversitetin «Iýrist» mamandyǵy boiynsha bitirgen.
Eńbek jolyn 2003 jyly Ońtústik Qazaqstan oblystyq ekonomika departamentiniń bas mamany qyzmetinen bastady.
2006-2009 jyldary QR Parlamentindegi Úkimet ókildiginiń bas sarapshysy, QR Ekonomika jáne biýdjettik josparlaý ministrliginiń bólim basshysy, QR Eńbek jáne halyqty áleýmettik qorǵaý ministriniń kómekshisi qyzmetterin atqardy.
2009-2014 jyldary – ShQO ákiminiń apparaty basshysynyń orynbasary, Semei qalasy ákiminiń orynbasary, Shyǵys Qazaqstan oblysy ákimi apparatynyń basshysy.
Ár jyldary QR Prezidenti Ákimshiliginiń memlekettik baqylaý jáne uiymdastyrý-aýmaqtyq jumystary bóliminiń memlekettik inspektory, Almaty qalasy Medeý aýdanynyń ákimi qyzmetinde bolǵan, QR Eńbek jáne halyqty áleýmettik qorǵaý ministriniń birinshi orynbasary qyzmetin atqardy.
2020 jyldyń aqpanynan bastap Jambyl oblysy ákiminiń orynbasary bolǵan.
«Qurmet» ordenimen, túrli memlekettik jáne halyqaralyq nagradalarmen marapattalǵan. Úilengen, 4 balasy bar.
