Ulttyq ulan sarbazdary oblystyq psihikalyq aýrýhana aýmaǵyndaǵy máiithana aýmaǵyn qorshap tur. Taraz, 27 tamyz 2021 jyl.
Jambyl oblysyndaǵy áskeri qoimada bolǵan jarylys qurbandaryn týystary juma, 27 tamyz kúni tústen keiin Tarazdaǵy oblystyq psihikalyq aýrýhana aýmaǵyndaǵy máiithanadan birtindep ákete bastady. Máiithana aýmaǵyn Ulttyq ulan sarbazdary qorshap tur, dep habarlaidy Azattyq radiosynyń tilshisi.
Ázirge naqty qansha adamnyń máiiti týystaryna berilgeni belgisiz. Biraq mekemeniń syrtynda turǵan adamdar máiithanadan marqumdardy kezekpen berip jatqanyn aitty. Jaqynyn joǵaltqan jandar kózine jas alyp, qaiǵyryp tur.
Resmi derek boiynsha, qaza tapqandar tiziminde atalǵan áskeri kúzet qyzmetkeri Orazbek Dálibaevtyń týystary da máiithanaǵa kelgen.
"Bul Allanyń basqa salǵany, basqa eshteńe aita almaimyz" dedi olar.
Kesheli beri órt sóndirýshi bolyp isteitin týysyn eshbir aýrýhanadan tappai, qaraly habardy juma kúni estigen adamdar da máiithana aldynda tur. Olar áli jarylys saldarynan mert bolǵan týysyn tanýǵa kirip úlgermegen. Kezek kútip tur. Tótenshe jaǵdai departamentiniń aty-jónin atamaǵan qyzmetkeri syrttaǵy bir top adamǵa kelip: "Eldos Sandybaev pen Arnur Temirbolatovtyń denesi máiithanada" dedi.
Bul eki adamnyń esimi resmi aqparatqa áli qosylǵan joq. Naqtylanbaǵan derek boiynsha, bilik habarlaǵan 5 adamnan bólek jarylys saldarynan qaza tapqan taǵy 4 adam máiithanaǵa ákelingen.
Órt sóndirýshi inisinen aiyrylǵan Taraz turǵyny (esimin atamady) "áskeri oq-dári jarylǵanda qoima aýmaǵyna nege órt sóndirýshilerdi kirgizdi, tek aýmaqty qorshaýy kerek edi, sý tigen snariadtar odan saiyn jarylmai ma?" deidi.
26 tamyz kúni keshke Jambyl oblysy Baizaq aýdanyndaǵy áskeri qoimada órt shyǵyp, oq-dári jarylǵan. Keiingi resmi málimet boiynsha, jarylys saldarynan 9 adam qaza taýyp, eki adam habarsyz ketken. Ondaǵan adam jaralanǵan. Áskeri qoimadaǵy jarylystan birneshe kúshti dúmpý bolyp, jaqyn mańdaǵy eldimekender evakýatsiialanǵan.
