"Qazgidromet" RMK sinoptikteri tamyz aiynda Qazaqstanda aýa raiy qandai bolatynyn aitty, - dep habarlaidy "Ult aqparat".
Meteorologtar boljamyna sáikes, tamyzdyń basynda Qazaqstan aýmaǵynyń basym bóliginde ystyq jáne qurǵaq aýa raiy saqtalady, tek shyǵysta, eldiń ońtústik-shyǵysyndaǵy taýly jáne taý bókterindegi aýdandarda naizaǵai men qysqa merzimdi jańbyr kútiledi.
"Elimizdiń batysynda, ońtústiginde, ońtústik-shyǵysynda aýa temperatýrasy túnde +20+25 gradýs, kúndiz +35+42 gradýs, soltústikte, ortalyqta jáne shyǵysta túnde +15+22 gradýs, kúndiz +30+37 gradýs bolady. Aýa temperatýrasynyń mundai joǵary fony, basqa aýa massalarynyń Qazaqstan aýmaǵyna kelýine jol bermeitin buǵattaýshy antitsiklonǵa bailanysty.
Biraq birinshi onkúndiktiń sońyna qarai, buǵattaýshy antitsiklon taraidy. Onyń ornyna Qazaqstan aýmaǵyna tsiklon keledi jáne onymen birge atmosferalyq fronttar birte-birte aýysady. Bul óz kezeginde naizaǵai men qysqa merzimdi jańbyr jaýýyna ákeledi. Keibir óńirde jel kúsheiýi múmkin. Sondai-aq, jylýdyń tómendeýi boljanady. Respýblikanyń ońtústik jartysynda aýa temperatýrasy kúndiz +25+30 gradýs, soltústik jartysynda +20+27 gradýsqa jetedi", - delingen boljamda.
Aidyń ekinshi onkúndiginde respýblikanyń soltústik jartysyna sýyq aýa massalary keledi. Bul aýa raiynyń turaqsyz sipatyna ákeledi. Jańbyr jaýady, taýly jáne taý bókterindegi aýdandarda qatty naizaǵai soǵyp, jeldiń kúsheiýi kútiledi.
"Soltústik óńirlerde aýa temperatýrasy kúndiz +17+25 gradýstan +23+30 gradýsqa deiin aýytqidy, al ońtústik óńirlerde aýa temperatýrasynyń negizgi aiasy +28+35 gradýs bolady. Aýa temperatýrasy kúndiz +23+28 gradýs bolatyn ońtústik óńirlerde qalypty jyly aýa raiy kútiledi, al soltústik óńirlerde aýa raiy kúzgi sipatqa ie bolady, kúndiz aýa temperatýrasy +17+22 gradýsqa jetedi", - delingen habarlamada.
