«Taliban» qozǵalysynyń (Qazaqstan aýmaǵynda tyiym salynǵan - avt.) ókilderi Aýǵanstan astanasy Kabýlǵa basyp kirdi. AQSh elshiligine tikushaqtar qona bastady. Bul týraly Associated Press agenttigi habarlady.
Aýǵan úkimetiniń úsh qyzmetkeri Associated Press agenttigine Kabýldyń úsh aýdany – Qalaqan, Qarabaq jáne Pagmanda tálipterdiń júrgenin aitty. Týra osynyń aldynda "Taliban" Jalalabad qalasyn baqylaýǵa alǵan.
Keiingi aptada "Taliban" Aýǵanstan aýdandaryn birinen keiin birin basyp alyp, úkimet kúshteri oisyrai jeńilip jatyr. Olarǵa AQSh áskeriniń áýeden demeýi de kómekteser emes.
Aýǵan astanasyndaǵy AQSh elshiliginen brondalǵan diplomatiia kólikteri ketip jatqany, sanaýly saǵattardan soń elshilik aýmaǵyna tikushaqtardyń kelip-ketip jatqany baiqalǵan. AQSh memlekettik departamenti bul qozǵalys týraly pikir bildirmedi, saýalǵa jaýap bermedi. Alaida elshiliktiń shatyrynan tútin baiqalady. Aty-jónin jasyrǵan eki AQSh áskeri qyzmetkeri diplomattardyń qupiia qujattardy joiyp jatqanyn aitty.
Chehiia da Aýǵanstandaǵy óz qyzmetkerlerin qaitarý týraly sheshim qabyldady. Olar osy sheshimniń aldynda Kabýldegi halyqaralyq áýejaiǵa jetkizilgen.
Senbi, 14 tamyz kúni halqyna joldaý arnaǵan Aýǵanstan prezidenti Ashraf Ǵani oqshaýlanǵan kúide qaldy. Ol senim artyp otyrǵan áskeri qolbasshylardyń bir bóligi "Talibanǵa" berilip, bir bóligi qashyp ketip, Ǵaniǵa áskeri turǵyda amal qaldyrmady. Katardaǵy kelissózder de tálipterdiń qarqynyn báseńdete almady.
Sońǵy táýlikte tálipter eldegi iri qalalar Mazari-Sharif pen Jalalabadty basyp alǵan. Sodan keiin Kabýl aýǵan úkimeti baqylaýyndaǵy jalǵyz iri qala bolyp qaldy.
Kabýldiń qoǵamdyq parkteri men buqaralyq oryndarynda myńdaǵan beibit turǵyn turyp jatyr. Olar bolashaǵyna alańdaidy. Bankomattar isten shyǵyp, kabýldyqtardyń jaǵdaiy odan ári qiyndady.
Aýǵandardyń kóbi "Taliban" bilikke kelse, repressiialyq zańdaryn qaita ornatýy múmkin dep úreilenedi. Eldi 1996-2001 jyldary basqarǵan "Taliban" ásirese áielderge qatal boldy. Olarǵa jumys isteýge, bilim alýǵa, er adamsyz syrtqa shyǵýǵa tyiym salyndy.
