Aýǵan tálipteri eldegi ekinshi mańyzdy, ári iri qala Qandaǵardy basyp alǵanyn málimdedi. Bul týraly Twitter-de qozǵalystyń baspasóz hatshysy habarlady.
"Qandaǵardy tolyq jaýlap aldyq" dep jazdy ol.
Buǵan deiin dalalyq jerde jáne qala ishinde shaiqas júrip jatqany habarlanǵan. Qandaǵar áýejaiy jumysyn toqtatty.
12 tamyzda Azattyqtyń Aýǵan redaktsiiasy "Taliban" toby bir aptadan az ýaqyt ishinde Aýǵanstannyń ońtústik-shyǵysyndaǵy aimaq ortalyǵy Ǵazni qalasyn basyp alǵanyn aitqan. Eldiń ishki ister ministrligi qalanyń kóp bóligi tálipterdiń baqylaýynda qalǵanyn, biraq urys jalǵasyp jatqanyn eskertti.
Ǵazni Kabýldan ońtústik-batysqa qarai 150 kilometr jerde ornalasqan. Qala úlken strategiialyq mańyzǵa ie, óitkeni ol astanany ońtústiktegi sodyrlardyń bekinisterimen bailanystyratyn Kabýl—Qandaǵar tas jolynyń boiynda ornalasqan. Pentagon buǵan deiin Aýǵanstan astanasyn tálipter bir-úsh ai ishinde basyp alýy múmkin dep boljaǵan. Áskeri mekemedegi derekkózge súiengen Washington Post basylymy osyndai habar taratty.
Aýǵan qaýipsizdik kúshteri Ǵazniden qashyp ketken qala gýbernatory men onyń orynbasaryn tutqyndady dep habarlaidy BBC. "Talibannyń" resmi ókili Zabihýlla Mýdjahid Twitter-de "Ǵazni qalasynda jaýdyń kóp bazasyn basyp aldyq, mýdjahidter gýbernatordyń rezidentsiiasyna qarai jyljyp barady" dep jazdy.
AQSh pen NATO-nyń basqa músheleri Aýǵanstannan áskerin shyǵaryp jatqan tusta tálipter el aimaqtarynyń birinen soń birin basyp alýda. Batys koalitsiiasy qyrkúiektiń ortasyna deiin eldegi barlyq áskerin alyp ketpek. VVS-diń málimeti boiynsha, tálipter Aýǵanstandaǵy 34 aimaqtyń 10-ynyń ortalyq qalalaryn basyp alǵan. Reuters 9 ortalyq qala tálipter qolyna ótti dep jazdy.
Júzdegen beibit turǵyn qaza bolyp, myńdaǵan adam úiinen qashty. Kóp aýyl jermen-jeksen bolǵan. Quqyq qorǵaý uiymdary elde gýmanitarlyq daǵdarys bolýy múmkin dep dabyl qaqty.
Aita keteiik, táýelsiz derekkkózder qalanyń basyp alyný týraly aqparatty rastaǵan joq, alaida áleýmettik jelilerde onyń kóshelerinde «Taliban» sodyrlary júrgen rolikter paida boldy.
Kandagardy basyp alý – «Taliban» úshin mańyzdy strategiialyq jeńis. Islamshylardyń Aýǵanstannyń basym bóligine ielik etýi jalǵasyp jatyr. Búginde qaqtyǵystar taǵy bir iri qala Geratta jalǵasýda.
Sársenbi kúni Pentagon amerikandyq azamattardyń evakýatsiialanýyn qamtamasyz etý úshin Kabýl áýejaiyna áskeriler jiberilgenin málimdedi.
