"Taliban" úkimetinde syrtqy ister ministri qyzmetin atqaratyn Ámir Han Mýttaqi.
"Taliban" (Qazaqstanda tyiym salynǵan) Aýǵanstan aýmaǵynda júrgen DAISh-pen (Qazaqstanda tyiym salynǵan, ózderin "Islam memleketi" dep ataityn ekstremistik toptyń arab tilindegi ataýynyń qysqartylǵan nusqasy – red.) jáne ózge de ekstremistik toptarmen kúreste AQSh-pen jumys istemeitinin aitty, dep habarlaidy Azattyq.
"DAISh-pen ózimiz-aq kúrese alamyz" dedi "Talibannyń" baspasóz hatshysy Sýhail Shahin 9 qazan kúni Associated Press aqparat agenttigine.
9-10 qazan kúnderi Katar astanasy Dohada AQSh pen "Taliban" ókilderi kezdesip jatyr. Bul – taraptardyń Aýǵanstanda tálipter bilikke kelgeli alǵash betpe-betpe kezdesýi.
AQSh biligi ázirge kezdesýdiń qalai ótip jatqany jóninde eshqandai pikir bildirmedi.
Aýǵanstan tálipterdiń qolyna ótkeli elde birneshe lańkestik shabýyl boldy. Bul shabýyldardy DAISh-tyń Aýǵanstandaǵy bólimi – Horasan toby moinyna aldy.
Eń qandy shabýyl 8 qazan kúni boldy. Aýǵanstannyń soltústiginde ornalasqan Qundyz ýálaiatyndaǵy shiit meshitiniń ishinde jankeshti ózin jaryp jiberip, 100-den astam adam mert boldy.
AQSh "Talibandy" shetel azamattary men elden ketkisi keletin aýǵandardy evakýatsiialaýǵa kedergi keltirmeýge shaqyryp, ekstremistik toptarmen kúres máselesin kótermek.
AQSh ókilderi Dohadaǵy betpe-bet kezdesý Vashingtonnyń "Taliban" úkimetin moiyndaýǵa daiyn ekenin bildirmeidi dedi.
Dohadaǵy Al-Jazeera English taratqan aqparatqa qaraǵanda, "Taliban" úkimetinde syrtqy ister ministri qyzmetin atqaratyn Ámir Han Mýttaqi AQSh-tan Aýǵanstan ortalyq bankiniń qarjysyn buǵattan shyǵarýdy suraǵan.
"Taliban" bilikke kelgende AQSh Aýǵanstannyń 9 milliardqa jýyq aqshasyn buǵattap qoiǵan. Saldarynan Aýǵanstan aqsha jetispei, azyq-túlik pen janarmaidyń baǵasy kúrt artqan.
Dál osy ýaqytta AQSh memlekettik hatshysynyń orynbasary Vendi Sherman Islamabadqa baryp, Pákistan biligimen Aýǵanstan máselesin talqylady.
Pákistan biligi Vashingtonnan "Talibandy" Aýǵanstannyń jańa biligi dep tanýdy jáne osy eldegi ekonomikalyq apattyń aldyn alý úshin halyqaralyq qorlardan qarjy bólýdi suraǵan.
Pákistan sondai-aq "Talibanǵa" da júginip, meilinshe inkliýzivti bolýǵa jáne adam quqyqtary men etnikalyq hám dini toptardyń quqyqtaryn qorǵaýǵa shaqyrǵan.
