Tálipter 72 shaqyrymnan astam jol júretin áielderge erlersiz nemese jaqyn týysynsyz jalǵyz saparlaýǵa tyiym saldy. "Taliban" (Qazaqstanda jáne basqa da kóptegen elderde tyiym salynǵan) biligi taksi jáne qoǵamdyq kólik júrgizýshilerine hidjabsyz júrgen áielderdi mingizbeýge jáne mýzyka qospaýǵa nusqaý bergen, dep habarlaidy Azattyq.
Aty-jónin aitpaǵan Kabýl taksisteriniń biri qarý ustaǵan "Taliban" ókilderiniń nusqaý bergenin aitty.
Al, "Taliban" úkimetiniń ókili Mohammed Sadyq Aqyf 26 jeltoqsanda ony rastady.
Qýǵyndaǵy aýǵan quqyq qorǵaýshysy Harýn Rahimi tálipter sheshimin synady.
Aýǵanstanda tálipter bilikti basyp alǵannan keiin quramynda birde-bir áiel joq úkimet quryp, eldi shariǵat zańdarymen basqaratynyn aitqan. Radikaldy islamshyl toptar burynǵy ákimshilik kezinde qurylǵan áielder isi jónindegi ministrlikti jaýyp, áielder quqyǵyn shektegen. Kóptegen qyz-kelinshek bilim alý quqyǵynan aiyrylǵan.
1996-2001 jyldary bilikte bolǵan kezeńde "Taliban" shariǵattyń qatań tártipterin ornatqan. Qazir olar adam quqyǵyn saqtaitynyn málimdese de kóptegen aýǵandar senbeitini baiqalady. "Taliban" qozǵalysy Qazaqstanda terror uiym dep tanylǵan.
