Kólik prokýrorlary «Petropavl-Almaty» baǵytyndaǵy №705 Talgo poiyzy jolaýshysynyń jas qyzǵa qatysty jynystyq sipattaǵy zorlyq-zombylyq áreketterine oqtalý týraly qylmystyq is qujattaryn zerdeledi. Bul týraly Bas kólik prokýratýrasynyń baspasóz qyzmeti málim etti, dep habarlaidy "Ult aqparat".
Atap aitqanda, 2019 jyly 3 qyrkúiekte atalǵan fakti boiynsha QK-tiń 121-baby 1-bóligimen sotqa deiingi tergep-tekserý bastaldy.
«2 qarashada «Qaraǵandy-Suryptaý» stansasyndaǵy jelilik politsiia bólimimen qylmys quramynyń bolmaýyna bailanysty sotqa deiingi tergep-tekserýdi qysqartý týraly sheshim qabyldandy. 8 qarashada Jezqazǵan kólik prokýratýrasy qylmystyq qýdalaý organynyń sheshiminiń kúshin joiyp, istiń barlyq mán-jailaryn tolyq jáne obektivti túrde qamtamasyz etý úshin nusqaý berip, qosymsha tergeýge qaitardy», - delingen habarlamada.
Osy oraida qylmystyq istiń tergeý barysy Bas kólik prokýratýrasynyń baqylaýynda tur.
Belgili bolǵandai, bul oqiǵanyń mán-jaiy Facebook-tegi «NeMolchi» paraqshasynda jazylǵan.
Biyl 2 qyrkúiek kúni stýdent qyz aǵasymen birge «Petropavl-Almaty» baǵytyndaǵy poiyzben jolǵa shyqqan. Qaraǵandyǵa jetkende atalǵan jigit túsip qalady da, qaryndasy ary qarai saparyn jalǵastyrady. Saǵat 23:50 kezinde kýpege 60 jas shamasyndaǵy jolaýshy kirgen.
Avtordyń jazýynsha, birazdan keiin uiyqtap jatqan qyz belgisiz bireý ony kiiminiń syrtynan sipalap jatqanyn sezgen. Stýdent dereý ornynan turyp, kýpedegi shamdy jaqqan. Sol kezde ózine qarama-qarsy orynda kýpege jaiǵasqan jolaýshynyń otyrǵanyn baiqaidy. Jas qyz kýpeden shyǵyp, jolserikti shaqyryp, bolǵan oqiǵany aitqan. Osydan keiin jolserik stýdentti basqa orynǵa kóshirgen.
Keiinnen ol bul oqiǵany aǵasyna habarlaǵan jáne poiyz qyzmetkerleri politsiia shaqyrtty.
