Ortalyq kommýnikatsiialar qyzmeti» respýblikalyq memlekettik mekemesiniń direktory Talǵat Qaliev Ulttyq qoǵamdyq senim keńesi qurylǵan alty aidyń jumysyn ózinshe qorytyndylady. Keńes múshesiniń aitýynsha, jarty jyldyń ishinde aitýly qadamdar jasalǵan, dep habarlaidy QazAqparat.
«Ulttyq keńestiń alty aidaǵy jumysy týraly aitar bolsaq, munda másele dinamikada emes – protsestiń júrip jatqanynda. Jarty jyldyń ishinde birtalai jumys jasaldy. Biraq qazir bizde jalpy saiasi mádeniet joq dep aitar edim. Jalpy ol – 30 jyl boiy konservatsiiada bolǵan nárse. Ony ózgertý kerek. Bul - eki jaqtyń da jumysy. Máselen beibit jiyndar týraly ártúrli pikir aitylyp jatyr. Kóbinese ol pikirtalastarǵa kirispeimin. Biraq qarap otyrsam, pikirleri qaishylasqan adamdar bir-birin «banǵa» kirgizip jatady. Demokrat bolam deseń ártúrli pikirlerdi tyńdaýǵa daiyn bolýyń kerek», - dedi Eýraziialyq integratsiia institýtyndaǵy «Ulttyq qoǵamdyq senim keńesi: taldamalyq zerdeleý» atty saraptamalyq baiandamanyń tanystyrylymynda.
Sarapshynyń aitýyna qaraǵanda, Ulttyq keńes qurylǵan alty aidyń ishinde kóp talqyǵa túsip jatatyn zańdar boiynsha edáýir progress bar.
«Onyń bir ǵana mysaly – Parlamenttik oppozitsiia. Prezidenttiń ózi bul qadamǵa daiyn bolyp otyr. Tiisinshe qazir bul ózgeris eshkimniń kózine kórine bermeýi múmkin. Biraq kúni erteń zań qabyldaýda nemese biýdjetti bekitýde bul ózgeristerdiń ózektiligi ózin kórseteri anyq. Sonymen qatar beibit jiynnyń eskertý nemese jazbasha ótinish berý tártibine qatysty ártúrli pikirler aitylýda. Bul pikirtalastyń óziniń printsiptik mańyzy zor», - deidi ol.
