Taldyqorǵanda 27 naýryzda «Altyn jebe» áskeri jattyǵýy kezinde tikushaq apatynan qaza tapqan jaýyngerlermen qoshtasýǵa arnalǵan miting ótti. Jetisýlyqtar Ortalyq alańǵa jinalyp, efreitorlar Aidyn Abdildinov pen Miras Jumataevty sońǵy saparǵa shyǵaryp saldy. Atap ótsek, apatta qaza bolǵan 13 áskeri qyzmetshiniń 8-i Almaty oblysynyń týmalary edi.
Aldymen Qazaqstan Respýblikasynyń Qorǵanys ministri, general-maior Nurlan Ermekbaev sóz alyp, marqumdardyń otbasy men jaqyn týystaryna kóńil aitty.
- Elbasymyz Nursultan Nazarbaevtyń jáne Qazaqstan Prezidenti Qasym-Jomart Toqaevtyń tapsyrmalary boiynsha qaza tapqan áskeri qyzmetshilerdiń otbasylaryna zańnamada belgilengen barlyq kepildi kómekter kórsetiletin bolady. Basqa da moraldyq-materialdyq, psihologiialyq qoldaýlar jasalady. Bul kómek bir jolǵy kómek bolmaýy kerek. Men garnizondar bastyqtaryna qazaq tapqan jaýyngerlerdiń otbasylaryn qamqorlyqqa alyp, olardyń balalaryn oqytý, áleýmettik máselelerin sheshý sharalaryn atqarýdy tapsyramyn. Qaza bolǵandardy máńgi este saqtaý úshin memorial turǵyzý josparlanýda. Qyzmettesterimiz óz áskeri boryshyn adal oryndaǵanyn eskere otyryp, olar memlekettik nagradalarǵa usynylatyn bolady, - dedi N. Ermekbaev. Sonymen qatar jetisýlyq tórt azamattyń denesi tiisti meditsinalyq saraptamadan ótkizilý ústinde ekenin de atap ótti.
Oblys ákimi Amandyq Batalov ta aýyr qaiǵyny bólisip, marqum jaýyngerlerdiń otbasylaryna barynsha kómek kórsetiletinin aitty:
- «Qaiǵyny bólisseń, azaiady», - deidi halqymyz. Bul qaiǵyly oqiǵa bárimizge de aýyr tidi. Qansha kómek kórsetkenimizben, qaiǵyny bólisip kóńil aitqanymyzben, azamattardy qaitara almaimyz. Bolǵan iske bolattai bekem bolyńyzdar. Bizdiń inilerimiz ózderiniń boryshtaryn eldiń aldynda, Otannyń aldynda adal ótedi. Men óz tarapymnan, Almaty oblysynyń jurtshylyǵy atynan topyraqtary torqa, jandary jannatta bolsyn deimin. Batyr uldarymyzdyń attaryn máńgige saqtap, urpaqqa úlgi etemiz. Artynda qalǵan balalaryna qamqorlyq jasap, árqashan kómek kórsetý – bizdiń paryzymyz, - dedi A. Batalov.
Munan soń Qazaqstan Musylmandary Dini basqarmasynyń tóraǵasy, Bas múfti Serikbai qajy Oraz, Almaty oblysy Qarýly Kúshteri ardagerler keńesiniń basshysy Rahym Qirgabakov sóz alyp, azamattardyń Táýelsiz eldiń tynyshtyǵyn kúzetý jolynda kóz jumǵanyn atap ótti. «Qaharman jaýyngerlerdiń esimi jadymyzda máńgi saqtalady», - dedi óz sózderinde.
Mitingide jaýyngerlerdi eske alyp, olardyń qurmetine aspanǵa ot atylyp, gúl shoqtary qoiyldy.
Búgin Taldyqorǵanmen qatar elimizdiń birqatar óńirinde jaýyngerlermen qoshtasý mitingileri ótti. Sonyń ishinde Talǵar, Kerbulaq aýdandarynda da ótip, jurtshylyq maior Timýr Qudaiberdiev pen leitenant Aslan Aitbaevty sońǵy sapraǵa shyǵaryp saldy. Al ózge tórt marqumnyń denesi tiisti saraptamadan ótý ústinde. Saraptama aiaqtalǵannan keiin, ol jaýyngerlerge arnap osyndai rásimder atqarylatyn bolady.
Atap ótsek, Almaty oblysynyń ákimdigi áskeri jattyǵý kezinde qaza bolǵan jetisýlyq azamattardyń otbasylaryna 1 mln. teńgeden kómek kórsetetin bolady. Sonymen qatar jerleý rásimderin atqarýdy kóterip almaq.
