Almaty oblysynyń ákimi Amandyq Batalovtyń aýdan, qala ákimderine meditsinalyq maskalardy tigýdi jolǵa qoiý jáne óndiris qarqynyn arttyrý týraly tapsyrmasyn oryndaý maqsatynda oblys ortalyǵy Taldyqorǵan qalasynda meditsinalyq betperde tigetin jańa tseh ashyldy, dep habarlaidy "Ult aqparat".
«Tehno Avia Grýp» JShS direktory Jarylqasyn Bolatulynyń aitýynsha, bul tsehta 50 tiginshi kúnine 30 myń betperde tige alady. Jalpy aýmaǵy 490 sharshy metrdi quraityn óndiris ornynda quny 28 mln. teńgeniń túrli qalyńdyqtaǵy materialdardy tigýge arnalǵan elektr qozǵaltqyshty joǵary jyldamdyqty ámbebap tigin mashinalary ornatylǵan. Olar eń kóbi minýtyna 5000 ret ainala alatyn tigis jyldamdyǵyna ie.
Qazirgi ýaqytta munda bir rettik qoldanylatyn 3 qabatty meditsinalyq betperdeler tigilýde. Aldaǵy ýaqytta birneshe ret paidalanýǵa bolatyn trikotajdy maskalar, halattar, kombinezondar, aljapqyshtar, qolǵaptar, jumys kúrtesheleri jáne tapsyrysqa bailanysty taǵy da basqa kiim-keshek túrlerin tigý jospary bar.
