illiýstratsiialyq sýret
Almaty oblysynyń 40 jastaǵy turǵyny qańtar aiynyń basynda oryn alǵan jappai tártipsizdik kezinde Taldyqorǵan qalasynyń kósheleriniń birinen birneshe qarý-jaraq taýyp alyp, erikti túrde politsiia organdaryna tabys etken, dep habarlaidy QazAqparat.
Almaty oblystyq Politsiia departamenti baspasóz qyzmetiniń málimetinshe, quqyq qorǵaý organdarynyń eskertýlerin basshylyqqa alǵan turǵyn tekserýden keiin jaýapkershilikten bosatyldy.
«Barlyq turǵyndardy taýyp alǵan zańsyz qarý-jaraqtardy esh oilanbastan politsiiaǵa tapsyrýǵa shaqyramyn. Osy áreketterińiz Sizderge sotqa deiingi tergeý amaldary kezinde kóp kómek kórsetedi. Men Ishki ister ministrliginiń turǵyndarǵa joldaǵan úndeýin eskerip, 5 qańtarda Taldyqorǵan qalasyndaǵy jappai tártipsizdik kezinde taýyp alǵan 11 tapansha men 1 dana avtomatty jaǵdai turaqtalǵan soń tártip saqshylaryna tabystadym. Osy arqyly barlyq jaýapkershilikten bosatyldym»,- deidi turǵyn óz úndeýinde.
Esterińizge sala keteiik, buǵan deiin QR Ishki ister ministrligi elimizdiń turǵyndaryna zańsyz saqtalǵan atys qarýy men oq-dárilerdi óz erkimen tapsyrý týraly úndeý jariialaǵan bolatyn. Tártip saqshylary eldegi jappai tártipsizdikter barysynda urlanǵan qarý men oq-dáriler zańsyz maqsattar úshin paidalanýy, sondai-aq azamattardyń ómiri men densaýlyǵyna qaýip tóndirýi múmkin ekenin eskertken.
«Qarý men oq-dárilerdi zańsyz saqtaǵany úshin qylmystyq (QK 287-baby – 5 jylǵa deiin bas bostandyǵynan aiyrý) jáne ákimshilik (QR ÁQBtK 482-baby-25 AEK aiyppul) jaýapkershilik kózdelgenin qaperlerińizge salamyz. Zańsyz saqtalǵan qarýdy, oq-dárilerdi jáne jarylǵysh zattardy óz erkimen tapsyrǵan adamdar, eger olardyń is-áreketterinde ózge qylmystar quramy bolmasa, qylmystyq jáne ákimshilik jaýapkershilikten bosatylady»- delingen vedomstvo taratqan úndeýde.
Almaty oblysynyń politseileri azamattardy zańsyz saqtalǵan qarýdy, oq-dárilerdi, jarylǵysh zattardy jáne arnaiy quraldardy óz erkimen tapsyrýǵa shaqyrady. Sonymen qatar, qoǵamdyq qaýipsizdik úshin qarýlar men jarylǵysh zattardy paidalanbaýdy, olardy múldem tasymaldamaýdy, jaýapkershilikke tartylmas úshin birden politsiiaǵa 102 nemese 112 telefondary arqyly habar berýdi suraidy.
