Taldyqorǵan qalasyndaǵy 6-shy shaǵyn aýdanda QR Konstitýtsiiasy kúniniń qarsańynda Alǵashqy mediko-sanitarlyq kómek kórsetý ortalyǵy iske qosyldy. Jańa shaǵyn aýdandardyń turǵyndary, iaǵni 16 myń adam munda barlyq qajetti meditsinalyq kómek túrlerin ala alady. Ortalyq bir aýysymda 320 adamdy qabyldaýǵa laiyqtalǵan, dep habarlaidy "Ult aqparat" Almaty oblysy ákiminiń baspasóz qyzmetine silteme jasap.
Meditsinalyq mekeme zaman talabyna sai quraldarmen tolyq jabdyqtalǵan, triaj-júiesi engizilgen. Munda 68 bilikti maman meditsinalyq qyzmet kórsetedi, ondaǵy 20 dárigerdiń 11-i – joǵary sanatty. Bir salaǵa mamandanǵandar arasynda pediatr-konsýltant, nevropatolog, kardiolog, hirýrg, travmatolog, otolaringolog, endokrinolog, akýsher-ginekolog, oftalmolog, ÝZI-diagnostika dárigeri, psiholog bar.
Atap ótsek, mundai ortalyqtar jýyq arada qalanyń basqa da shaǵyn aýdandarynda, kottedjdi qalashyqta ashylatyn bolady.
Jalpy Almaty oblysynda 806 meditsinalyq mekeme, olarda 5 myńdai dáriger meditsinalyq qyzmet kórsetedi. Alǵashqy mediko-sanitarlyq kómekti damytý men jańǵyrtý - jumystyń basty baǵyttarynyń biri. Meditsinalyq uiymdardyń materialdyq-tehnikalyq bazasyn jaqsartý maqsatynda biylǵy jyly Almaty oblysynda 11 nysan salý josparlanǵan: 9 dárigerlik ambýlatoriia, Raiymbek jáne Kerbulaq aýdandarynda bir aýysymda 250 adamdy qabyldaityn 2 emhana paidalanýǵa beriledi. Sarqan aýdandyq ortalyq aýrýhana men Shelek aýylyndaǵy ortalyq aýdandyq aýrýhanada jańǵyrtý jumystary júrgizilýde. Memlekettik-jekemenshik seriktestik sheńberinde Jambyl aýdany Uzynaǵash aýylynda emhananyń qurylysy bastaldy. «Aýyl - el besigi» baǵdarlamasy boiynsha Eskeldi, Kóksý aýdandaryndaǵy ortalyq aýdandyq aýrýhanalardy kúrdeli jóndeý josparlanǵan.
