Tailandta koronavirýs infektsiiasyna qarsy jappai vaktsinalaý bastaldy, dep habarlaidy "Ult aqparat" Sanitariialyq-epidemiologiialyq baqylaý komitetiniń baspasóz qyzmetine silteme jasap.
Memlekette, eń aldymen, Bangkok, Phýket jáne onyń mańyndaǵy eldi mekenderdiń turǵyndary egiledi. Elordadaǵy vaktsinatsiia ortalyqtarynda kún saiyn 70 myń adamǵa ekpe salynady dep kútilýde. Boljam boiynsha maýsym aiynda elde immýndalǵan azamattardyń jalpy sany 6 mln-ǵa jetpek. Vaktsinatsiialaý naýqany jaqsy nátijelerdi kórsetken jaǵdaida, bilik elge kirýshiler úshin mindetti karantindi alyp tastaýǵa jáne ekpe saldyrǵan týrister úshin shekteýlerdi alyp tastaýǵa nietti.
Malta koronavirýstyq infektsiiamen kúreste jeńiske qol jetkizýde. Ótken táýlikte elde sońǵy 11 aida alǵash ret COVID-19 juqtyrýdyń birde-bir jaǵdaiy anyqtalǵan joq. Bul týraly eldiń densaýlyq saqtaý ministri Kris Ferne habarlady. Ol otandastaryn jaýapkershilik tanytýǵa jáne pandemiiamen kúresý úshin barlyq qajetti sharalardy saqtaýdy jalǵastyrýǵa shaqyrdy. Maltada eresek turǵyndardyń jartysynan kóbi koronavirýstyq infektsiiaǵa qarsy vaktsinanyń eki dozasyn, tórtten úshi - kem degende bir dozasyn alǵan.
Chernogoriia reseilik týristerdiń kirýine qoiylǵan shekteýlerdi alyp tastaidy. Atap aitqanda, endi reseilikterge PTR testiniń teris nátijesi bar anyqtamany usynýdyń qajeti joq. Sonymen qatar, Serbiia, Kosovo, Bosniia jáne Gertsegovina, Horvatiia, Albaniia, Belarýs, Ýkraina, Soltústik Makedoniia, Eýropalyq Odaqqa múshe elder, Izrail, sondai-aq COVID-19 qarsy egilgen basqa memleketterdiń azamattary úshin engizilgen shekteýler alynyp tastaldy.
