Indoneziiada ótip jatqan jazǵy Aziia oiyndarynda qazaqstandyq taekvondoshy Fariza Aldonǵarova 53 kelide qola medal aldy. Ol jartylai finalda taipeilik Si Po Iannan jeńildi, dep habarlaidy Azattyq tilshisi.
Aldonǵarova alǵashqy ainalymda ózbekstandyq Dinorahan Mamadibragimovany 17:16 esebimen, shirek finalda irandyq Elah Sheidaidy 11:3 esebimen jeńdi.
- Birinshi kezdesýde ózime senbegendei boldym. Biraq daiyndyǵymdy, Qazaqstanda jankúier bolyp otyrǵan ata-anamnyń, menimen birge jarysqa kelgen bapkerlerimniń úmitin aqtaýǵa tyrystym. Ózbekstan sportshysymen osyǵan deiin eki ret kezdesip, birinshi kezdesýde men, ekinshisinde ol jeńiske jetken. Al taipeilik sportshymen birinshi ret kezdestim. 2014 jylǵy Aziia oiyndaryna da qatysqan edim. Ol kezde birinshi ainalymda irandyq sportshydan jeńilip qalǵanmyn. Al biylǵy Aziia oiyndaryna Almatyda jáne Ońtústik Koreia daiyndaldyq. Ońtústik Koreiada úsh aptadai daiyndaldyq, - deidi sportshy.
Bul - Qazaqstannyń biylǵy Aziia oiyndaryndaǵy besinshi medali. 19 tamyzda qazaqstandyq semserlesýshi Dmitrii Aleksanin altyn alǵan. Erkin kúresten Qazaqstan erler quramasy bir kúmis, eki qola ielengen.
Qazaqstannan Aziadaǵa 440 sportshy qatysady. Aziia oiyndary qyrkúiektiń 2-ci kúni aiaqtalady.
