QR Mádeniet jáne sport ministriniń mindetin atqarýshy Nurqisa Dáýeshov senatorlarǵa tarihi-mádeni mura obektilerin qorǵaý eki zań jobasyn tanystyrdy, dep habarlaidy QazAqparat.
«Zań jobalarynda tarix jáne mádeniet eskertkishteriniń túrleri keńeitilgen. Máselen, Memleket basshysynyń «Rýxani jańǵyrý» baǵdarlamalyq maqalasynda aiqyndalǵan mindetterdi tiimdi júzege asyrý úshin «Kieli obektiler» jeke blokqa bólindi. Bul obektilerdiń bárine birdei qorǵaýdyń airyqsha rejimi qoldanylady. Sondai-aq, obektilerdiń airyqsha túri retinde monýmentaldyq óner qurylysy bólek shyǵaryldy. Mundai tásil, tarixi-mádeni mura obektileriniń kórkemdik qundylyǵyna, sapasyna jáne saqtalýyna óz áserin tigizetini anyq», - dedi ol Parlament Senatynyń otyrysynda.
Onyń aitýynsha, tarixi-mádeni mura obektilerin anyqtaý men esepteý máseleleri bir júiege keltirilgen. Búgingi kúni zańǵa sáikes arxeologiia eskertkishteri olardy tapqan sátten bastap avtomatty túrde tarix jáne mádeniet eskertkishteri bolyp tanylady. Alaida Nurqisa Dáýeshov arxeologiia eskertkishterin tolyq zerttemei, olardy tarix jáne mádeniet eskertkishterine birden qosa salý maqsatsyz ekenin atap ótti.
«Sondai-aq, bastapqy esepke alý tizimine engizilgen obektiler sol tizimde uzaq merzim boiy tirkelip turǵanymen, olardyń basym kópshiligine qatysty jyldar boiy eshqandai shara qoldanbaityn úrdis barlyq jergilikti jerde oryn alǵan. Osyndai keleńsiz jaittardy boldyrmaý úshin tabylǵan arxeologiialyq obektilerdi mindetti túrde basqa da obektilermen birdei aldyn ala esepke alý tizimine engizý qarastyrylyp otyr. Sonymen qatar, jalpy bul tizimde bolatyn merzim belgilendi (3 jylǵa deiin, kei jaǵdailarda 5 jylǵa deiin). Aldyn ala esepke alý tizimindegi obektige eskertkish mártebesin berý nemese ony tizimnen alyp tastaý týraly sheshimdi qosymsha tarixi-mádeni saraptamanyń qorytyndysy negizinde jergilikti atqarýshy organdar qabyldaidy», - deidi ol.
Osylaisha, tarixi-mádeni mura obektilerin naqty anyqtaý, esepke alý jáne odan ári qarai ilgeriletý tártibi olardyń mártebesi men ári qarai qorǵaý rejimin obektivti anyqtaýǵa múmkindik bermek.
