Óńir basshysy Qyrymbek Kósherbaev 19 naýryz kúni Qyzylorda qalasyndaǵy birqatar qurylys nysandarynyń jumystarymen tanysty, dep habarlaidy oblys ákiminiń baspasóz qyzmeti.
Syrdariia ózeniniń sol jaǵalaýynda jańa turǵyn úi qurylystaryn júrgizý úshin jer tegisteý jumystary bastaldy. Onda 18 kóp qabatty úi jergilikti kásipkerlerdiń jeke qarjysy esebinen boi kótermek. Qala ákimi Nurlybek Nálibaevtyń aitýynsha, munda aǵymdaǵy jyldyń qyrkúiek aiynda keminde 20 kópqabatty úi salynady dep kútilýde.
- Sonymen qatar biz áleýmettik nysandar qurylysy boiynsha kásipkerlermen birlesip jumys jasap jatyrmyz. «Abý Ser» kompaniiasy 320 oryndyq balabaqsha qurylysyn salýǵa kiristi. Taǵy bir kásipker munda saýda ortalyǵyn ashpaq, - dedi Nálibaev.
Oblys ákimdiginiń janynda arnaiy shtab quryldy.Sońǵy shtab otyrysynda Jastar saraiynyń, onkologiialyq ortalyqtyń, meshittiń, «Bolashaq» ýniversiteti qalashyǵy qurylystarynyń jobalary maquldanyp, qoldaý kórsetildi.
Aimaq basshysy jaýapty tulǵalarǵa sol jaǵalaýda qurylys júrgizýge nietti kásipkerlerdi qoldaý qajettigin eskertti. Bul óz kezeginde jańa jumys oryndarymen qatar salyq bazasyn ulǵaitýǵa da septigin tigizedi.
Sondai-aq Qyrymbek Kósherbaev qurylys nysandarynyń arhitektýralyq kelbeti ulttyq, shyǵystyq úlgige sai bolý qajettigin aitty.
- Injenerlik-infraqurylym máselelerin sheshý óz qolymyzda. Saraptamalar jaqyn arada daiyn bolǵan soń biýdjettik ótinim jasaý úshin máslihattyń kezekten tys sessiiasyn ótkizý kelisilgen,- dedi oblys ákimi.
Osy kúni Demesinov kóshesindegi 230 páterlik kópqabatty 4 úidiń alǵashqy kirpishi qalandy. Bul turǵyn úi «Óńirlerdi damytý-2020» baǵdarlamasy aiasynda «Samuryq Qazyna» jyljymaityn múlik qory» AQ-men birlesip salynýda jáne aǵymdaǵy jyldyń jaz maýsymynda paidalanýǵa berilmek.
Sonymen qatar oblys ákimi saiasi qýǵyn-súrgin qurbandaryna arnalǵan eskertkishti qaita jańǵyrtý jumystarymen tanysty. Eskertkish aýmaǵyna alleia salynyp, túngi jaryqshamdar ornatylyp, asfalt jol tóseledi. Qaita jańǵyrtý jumystary saiasi qýǵyn-súrgin jáne asharshylyq qurbandaryn eske alý kúnine qarsy aiaqtalmaq.
Budan bólek aimaq basshysy Qorqyt ata kóshesi aýmaǵyndaǵy 5,8 shaqyrym jolǵa júrgizilip jatqan jóndeý jumystaryn kórdi (Qazybek bi kóshesinen bastap «Qyzylorda-Jezqazǵan» trassasy aralyǵy). Bas merdiger «ÝAD» JShS asfalt tóseý, túngi jaryqtandyrý, joldyń eki jaǵyna aryq pen avtobýs aialdamalaryn salý jumystaryn júrgizýde.
Bir sózben aitqanda Ulystyń Uly kúni «Naýryz» merekesi qarsańynda qyzylordalyqtar Astanadan úlgi ala otyryp, Syrdariianyń sol jaq jaǵalaýynda jańa qala qurylysyna kirisip ketti.
