«Nur Otan» partiiasy Tóraǵasynyń Birinshi orynbasary Muhtar Qul-Muhammed Qyzylorda oblysyna bardy, dep jazady "Ult aqparat".
Sapardyń basty maqsaty – Elbasy tapsyrmalarynyń, sonyń ishinde Memleket basshysynyń «Bolashaqqa baǵdar: rýhani jańǵyrý» baǵdarlamalyq maqalasynda aitylǵan basymdyqtardyń óńirde júzege asý barysyna baqylaý júrgizý. Soǵan orai Muhtar Qul-Muhammed pen oblys ákimi Qyrymbek Kósherbaev «Qorqyt ata» memorialdy kesheninde boldy jáne ortaǵasyrlyq Syǵanaq qalasyn qaita qalpyna keltirý jumystarymen tanysty.
Sapar aiasynda «Nur Otan» partiiasy Tóraǵasynyń Birinshi orynbasary memorialdy keshen, mýzei jáne osy mańda ornalasqan etnoaýyl jumysyna erekshe nazar aýdaryp, mundai tarihi oryndardyń otanshyldyq pen ulttyq biregeilikti saqtap, nyǵaitýda mańyzdy rólge ie ekenin aitty.
«Táýelsiz elimiz shirek ǵasyr ishinde qaryshtap damyp, Qazaqstan álem tanyǵan abyroily memleketke ainalǵanda Elbasymyz rýhani jańǵyrý baǵdarlamasyn usyndy. Onyń maqsaty jas urpaqty babalar tarihynan taǵylym alǵan elin, jerin súietin otanshyl rýhta tárbieleý. Sondyqtan «Nur Otan» ult rýhaniiatyn túletýge arnalǵan Elbasy tapsyrmasynyń elimizdiń barlyq óńirlerinde oidaǵydai júzege asýyn erekshe nazarda ustaityn bolady», – dedi partiia Tóraǵasynyń Birinshi orynbasary Muhtar Qul-Muhammed.
Sonymen qatar partiia Tóraǵasynyń Birinshi orynbasary oblystaǵy aýyl sharýashylyǵynyń damý barysyna nazar aýdaryp, bul sala boiynsha óńirde Elbasy tapsyrmalarynyń oryndalýyna baqylaý júrgizdi. Soǵan sáikes ol oblystaǵy aýylsharýashylyq ónimderin óndirý isinde kópke úlgi bolyp otyrǵan iri kásiporyn RZA aktsionerlik qoǵamynda boldy. Oblys ortalyǵynan shalǵaida jatqan Qazaly aýdanyndaǵy bul sharýashylyqtyń negizi indýstrialdy-innovatsiialyq damý baǵdarlamasynyń arqasynda qalanǵanyn atap ótken jón. Kásipker Samurat Imandosov basqaratyn sharýashylyqta sútti, asyl tuqymdy golshtino-friz siyrlary ósiriledi. Bastapqyda kásipker Vengriiadan atalǵan mal tuqymynyń 650 basyn alyp kelgen eken. Búginde sharýashylyqta 1600 bas asyl tuqymdy siyr maly bar. Memleket tarapynan kórsetiletin barlyq qoldaýdyń igiligin kórip otyrǵan kásiporynda qazirgi zamanǵy sút óndeý jáne taýarly sút ónimderin daiyndaý zaýyty jumys isteidi. Ár siyrdan alynatyn súttiń jyldyq kólemi – 8000 litr. Odan bólek, bul kásiporyn 1 mlrd. teńgeden astam qarjyny quraityn bidai jáne jem-shóp daqyldaryn ósirýmen de ainalysady. Sharýashylyqtaǵy barlyq tehnologiia tolyǵymen Eýropadan, sonyń ishinde Germaniia, Irlandiia jáne Gollandiiadan ákelingen.
Shyny kerek, aýa temperatýrasy jazda +50 gradýsqa deiin kóterilip, qysta -40 gradýsqa deiin tómendeitin, ósimdik ataýly joqtyń qasy, sý máselesi de tolyq sheshilmegen óńirde mal ósirý naǵyz tabandylyqty qajet etedi. Tipti taqyr jerde dál osylai sharýasyn dóńgeletip otyrǵan sharýashylyq dúniejúzinde de sirek ekeni anyq. Basqa kásipker bolsa baiaǵyda qolyn bir siltep, ózge salaǵa aýysyp ketýi de ábden múmkin edi. Al S.Imandosov sońyna deiin tózimdilik tanytyp, búginde sonyń jemisin jep otyr. Qazirgi tańda RZA sharýashylyǵynyń ónimderin Almaty qalasyndaǵy «Magným» jáne «Smoll skif» dúkender jelisinen alýǵa bolady. Odan bólek, Astana, Atyraý, Mańǵystaý, Aqtóbe, Qyzylorda, Baiqońyr qalalarynda da RZA-nyń ónimderi satylady.
«Bizdiń sharýashylyqta búginde 200 adam turaqty jumyspen qamtylǵan. Elbasymyzdyń sharýalarǵa jasap otyrǵan qoldaýynyń arqasynda osyndai ekologiialyq-ekstrimaldy aýdandarda kásippen ainalysyp, jergilikti halyqty turaqty jumyspen qamtamasyz etý múmkin bolyp otyr. Sondyqtan bizdiń ujym Memleket basshysyna zor alǵystaryn bildiredi», – deidi kásipker S.Imandosov.
Qyzylorda oblysyna sapary barysynda Muhtar Qul-Muhammed Kishi Araldy qaita qalpyna keltirý jumystarymen de tanysty. Elbasynyń bastamasymen búginde aimaqta «Syrdariia ózeniniń arnasyn retteý jáne Soltústik Aral teńizin saqtaý» atty «ǵasyr jobasynyń» birinshi kezeńi sátti júzege asyryldy. Sol arqyly álem boiynsha eń iri qurlyqtyq sý qoimalarynyń birin qaita jandandyrýǵa múmkindik týyp otyr.
