Qyzylorda oblysy Jańaqorǵan aýdanynda oryn tepken Syǵanaq qalashyǵyn Qazaqstan jáne Ózbekstan arheologtary birge zertteý isin qolǵa aldy, dep habarlaidy QazAqparat.
Bul is-sharalar Tuńǵysh Prezident - Elbasy Nursultan Nazarbaevtyń «Bolashaqqa baǵdar: rýhani jańǵyrý» baǵdarlamasy aiasynda qolǵa alynyp otyr.
Syǵanaq qalashyǵyn jan-jaqty zerdeleý sharalaryna Túrkistan qalasyndaǵy halyqaralyq qazaq-túrik ýniversitetiniń arheologiialyq zertteý institýty ǵalymdary belsendi túrde atsalysyp keledi. Ýniversitet arheologtary 2003 jyldan beri bul baǵytta kóptegen jumystardy júzege asyrdy. Búgingi kúnge deiin ótken kúnderdiń belgisi retinde kóptegen kóne jádigerler qolǵa tústi. Ǵalymdar eski kezeńnen syr shertetin san alýan sándi ǵimarattardyń ornyn tapty.
Ǵalymdardyń aitýynsha, bul qalashyq ornynan qumyra, aqsha, syrǵa, júzik jáne súiekten jasalǵan buiymdar shyqqan. Sondai-aq, munda turǵan adamdar oinaǵan asyqtar da qolǵa ilindi. Bir orynnan 30-40 asyq tabyldy. Sonymen qatar, qazba jumystary barysynda Syǵanaqtyń ornalasý jaǵdaiy da anyqtalyp jatyr. Nátijesinde ǵalymdar kóne shahardyń shyǵys qaqpasynyń ornyn anyqtady.
«Syǵanaq qalashyǵy UNESCO-nyń Dúniejúzilik muralarynyń aldyna ala tizimine engizilgeni belgili. Búginde kóne qalashyqty týrizm ornyna ainaldyrý baǵytynda nátijeli jumystar atqarylyp keledi. Syǵanaqtyń aýmaǵy qorshaldy, munaraly qaqpasy men qorǵan qabyrǵalarynyń birqatar bóligi 3 metr biiktikke deiin qalpyna keltirildi. Osynyń nátijesinde shamamen H ǵasyrdan bastap tarihtan belgili qala ashyq aspan astyndaǵy murajaiǵa anialdy. Biyl bizdiń zertteý jumystarymyzǵa ózbek áriptesterimiz de atsalysyp otyr», - dedi Túrkistan qalasyndaǵy halyqaralyq qazaq-túrik ýniversitetiniń arheologiialyq zertteý institýtynyń aǵa ǵylymi qyzmetkeri Mels Baqytbaev.
Syǵanaqty zertteý sharalaryna Ózbekstannyń Samarqand qalasyndaǵy Orta Aziia zertteýler halyqaralyq institýty ǵalymdary keldi. Olar qazaqstandyq áriptesterimen birge Syǵanaqty jan-jaqty zertteýge nazar aýdaryp otyr.
