Sultan Beibarystyń Kairdegi meshitin restavratsiialaý jumystary 2020 jylǵy shildede aiaqtalady. Bul týraly "Ult aqparat" SIM baspasóz qyzmetine silteme jasap habarlaidy.
Qazaqstannyń Mysyrdaǵy Elshisi Arman Isaǵaliev MAR Kóne eskertkishter jáne týrizm ministri Haled Ál-Annanimen kezdesip, eki el arasyndaǵy týrizm salasyndaǵy yntymaqtastyqty damytý joldaryn qarastyrdy.
Atap aitqanda, diplomat sońǵy jyldary Qazaqstannan Sharm al-Sheih pen Hýrgadaǵa tikelei charterlik reister ashylýynyń arqasynda Mysyr kýrorttaryna keletin qazaqstandyq týristerdiń sany edáýir artqanyn aitty.
Biylǵy jyldan bastap, Mysyrda keńinen júrgizilip jatqan aqparattyq-jarnamalyq kampaniianyń arqasynda mysyrlyq týristerdiń bizdiń elge kelýge degen qyzyǵýshylyǵy da artýda. Osyǵan orai, Elshi eki el arasyndaǵy týristik aǵymdy keńeitý úshin mysyrlyq áýekompaniialardyń Qazaqstanǵa tikelei áýe reisterin ashýǵa qolǵabys berýdi surady. H.Ál-Annani MAR Azamattyq aviatsiiamen birlesip bul máseleni jaqyn arada sheshýge ýáde etti. Ministrdiń aitýynsha, qosymsha reisterdiń ashylýy tek ózara týrizmniń ósýine ǵana emes, eki el arasyndaǵy biznes qatynastary men saýda-ekonomikalyq yntymaqtastyqtyń jandanýyna serpin beredi.
Buǵan qosa, A.Isaǵaliev Uly Dala Eliniń dańqty perzenti Sultan Beibarystyń Kairdegi meshitin qalpyna keltirý jumystaryn jańǵyrtqany úshin Mysyrdyń Úkimeti men Kóne eskertkishter jáne týrizm ministrligine zor alǵys bildirdi.
Qazirgi kezde jumystar qarqyndy júrgizilýde. Atalmysh jobanyń bas merdigeri – Mysyr men Taiaý Shyǵystaǵy eń iri «Arab Contractors» qurylys kompaniiasy ókilderiniń aitýynsha, meshitti restavratsiialaý jumystary tolyǵymen 2020 jylǵy shildede aiaqtalýy tiis.
Eske salsaq, ótken jyly Mysyr úkimeti Sultan Beibarys meshitin qalpyna keltirýge 181 mln fýnt bólgen bolatyn.
