Tbilisidegi Sýhými memlekettik ýniversitetinde qazaqtyń uly aqyny, oishyly jáne aǵartýshysy Abaidyń dárishanasy ashyldy, dep habarlaidy "Ult aqparat" Qazaqstannyń Grýziiadaǵy Elshiligine silteme jasap.
Dárishananyń ashylý saltanatyna Grýziia mádeni jáne ǵylymi orta ókilderi, joǵarý oqý ornynyń oqytýshylary men stýdentteri, jergilikti jýrnalister qatysty.
Atalmysh aýditoriia uly aqynnyń mereitoiy sheńberindegi is-sharalardyń biri retinde QR Grýziiadaǵy Elshiliginiń jáne Qazaqstan-grýzin mádeni-ekonomikalyq birlestiginiń qoldaýymen jabdyqtalǵan bolatyn. Ol Qazaqstan týraly kitaptarmen, merzimdik basylymdarmen, kompiýterlik tehnikamen qamtylǵan.
QR Grýziiadaǵy Tótenshe jáne Ókiletti Elshisi Baýyrjan Muhametjanov óziniń sózinde atalmysh dárishanany Qazaqstanǵa ashylǵan «terezege» teńei otyryp, onyń elimiz týraly aqparattyq ortalyqqa ainalatynyna senim bildirdi.
Saltanat barysynda hákim Abaidyń óleńderin tuńǵysh ret grýzin tiline aýdarǵan Grýziia Jazýshylar odaǵynyń tóraiymy, belgili grýzin aqyny Makvala Gonashvilige QR Prezidenti Qasym-Jomart Toqaevtyń Alǵys haty tabys etildi. Jinalǵandar grýzin oqyrmandarynyń Abaidyń máńgilik murasymen óz ana tilinde tanysý múmkindigi eki dostas halyqtar arasyndaǵy ózara tartylys pen túsinistikti tereńdete túsetinine senim artty.
