Foto: Ashyq derekkóz
Aqtóbe oblysynda qarǵyn sýǵa ketken mal ólekselerin órtep jibermese, indet taraýy múmkin deidi mamandar. Biraq shyǵyndy óndirý úshin de dálel kerek. Al aýyl halqy sýǵa isingen tórt túlikti saqtap otyra almaimyz deidi. Tasqynǵa qatysty qurylǵan komissiia shyǵyn óndirýdi óleksege qarap baǵalamaityn boldyq dep otyr. Sol sebepti aram qatqan mal-múlik órteletin boldy, dep habarlaidy «Ult aqparat» KTK arnasyna silteme jasap.
Oiyl aýdanyna qarasty Qaratal aýylynyń turǵyndary qarǵyn sý kelerde qoradaǵy usaq maldy shyǵaryp úlgermegen. Býaz siyr men buzaýlaǵan múiizdi iri qara da aýyl ishinde qalypty. Qazir endi ólekseleri teńkiip ár jerde jatyr. Sýda qalǵan tórt túliktiń ishi isip, kúlimsi iis aýyldy alyp ketken. Kúni keshe tekserýge kelgender ólekselerdi saqtap qoiýdy tapsyrypty. Odan bólek aǵyspen ketken mal shyǵynyn qalai óndiremiz dep otyr.
Bersiev aýyl okrýginiń Qaratalyndaǵylar tek tórt túliktiń arqasynda kún kórip otyr. Mal basyn kóbeitý úshin nesie alǵandary da jeterlik. Shyǵynymyzdy eselep almasaq ta, qoradaǵy iri qaramyz ben qoi-eshkimizdi túgendep berse deidi.
"Bersiev malmen otyr. El malsyz qaldy. Birinshi janymyz dep oiladyq. Jan qalǵannan keiin mal kerek. Kreditke alynǵan mal bar. Solardyń bári óndirilip, barlyǵyn aiaǵynan turǵyzsa. Bizdiń ótinish sol", - deidi Qaratal aýylynyń turǵyny Ermekbai Orazǵaliev.
Aýyl ákimi tasqynan keiin osy mal ólekselerinen qaýip baryn jasyrmaidy. Indet tarap kete me dep alańdap otyrǵanyn aitady. Biraq ólekselerdi aýyl syrtyna shyǵaryp tastaýǵa múmkindik joq dep otyr.
"Óte qaýipti. Aýrý tarap ketýi múmkin. Barymyzsha ózimiz úiden shyǵaryp, daiyndap, bir jerge úiip jatyrmyz. Óitkeni kólik bara almaityn jerler bar. Qazyp ketken. Soǵan bir jerde jinap qoiyp jatyrmyz. Áýeli aýyl ishindegini jinaqtap alyp, solardy esepke alamyz dedi", - deidi Sh. Bersiev aýyl okrýginiń ákimi Nurbek Sháýmenov.
Al arnaiy komissiia tórt túliktiń shyǵynyn veterinarlardyń tizimi boiynsha túgendeimiz dep otyr. Iaǵni aǵyspen ketken maldyń óleksesin izdeýdiń qajeti joq. Sondyqtan aýyl ishindegi ólekselerdi dereý órteýge tapsyrma beripti.
