Almaty qalasynyń qylmystyq ister jónindegi mamandandyrylǵan aýdanaralyq sotynyń sýdiasy Erkin Maishinov 2021 jyldyń qyrkúieginde bes adamdy atyp óltirgen Igor Dýjnovqa ne sebepti ómir boiyna bas bostandyǵynan aiyrý jazasy taǵaiyndalǵanyn túsindirdi, dep habarlaidy Sputnik Qazaqstan.
Sýdia Dýjnovtyń áreketi asa aýyr qylmys sanatyna jatatynyn aitty. Ol bes adamdy óltirgen jáne taǵy úsh adamdy óltirýge tyrysqan. Saldarynan bes otbasy asyraýshysyz, olardyń balalary ákesiz qaldy.
"Dýjnov istegen isine ókinbedi, jábirlenýshilermen tatýlasý úshin eshqandai shara qoldanbady. Sotta jábirlenýshi taraptan keshirim suramady, iaǵni ózi úshin tiisti qorytyndy jasamady. Bul onyń qylmysqa beiim ekenin jáne túzelý jolyna túskisi kelmeitinin kórsetedi", - dedi sýdia.
Osynyń bári Dýjnovtyń qoǵam úshin qaýipti ekenin kórsetedi, sondyqtan ony ómir boiyna bas bostandyǵynan aiyrý qajet ekeni aityldy.
Sondai-aq Dýjnovtyń adamdardy atyp, osylaisha banktegi oligarhiiamen jáne onyń seriktesterimen kúreskeni týraly aitqanyna esh dálel joq. Sebebi qaitys bolǵandardyń bankke esh qatysy bolmaǵan.
Sot oryndaýshysy Ábenov 2018 jyly ótken elektrondy saýda-sattyqty iske asyrý protsesine qatyspaǵany jáne atqarýshylyq is júrgizýdi tek 2021 jyly bastaǵany anyqtaldy.
Jábirlenýshi Turǵynov – úidiń jańa iesi, "Qazaqfilm" kinostýdiiasynda qarapaiym júrgizýshi bolyp jumys istedi jáne 2018 jyly úidi zańda belgilengen tártippen aýktsionda 15 million teńgege satyp alǵan.
Politsiia qyzmetkerleri Súleev, Baiǵaziev, Orazalinov, Sabyrov sot oryndaýshysynyń suraýyn oryndaý úshin úiden shyǵarýǵa qatysty jáne jergilikti jerde qoǵamdyq tártipti qamtamasyz etip, ózderiniń qyzmettik boryshyn oryndady.
"Jábirlenýshiler aýlaǵa kirip, zańdy túrde úiden shyǵarýǵa qatysqan. Dýjnov jáne onyń otbasy múshelerine shabýyl jasamaǵan. Dýjnovtyń qolyndaǵy qarýdy kórgen soń aýladan shyǵyp ketýge múmkindik berýin suraǵan. Soǵan qaramastan Dýjnov olardy aiaýsyz atyp tastady, sol sebepti sottalýshynyń ózin qorǵadym degen ustanymy qoldaý tappady", - dedi Maishinov.
Sýdia Dýjnovtyń sheteldegi qarýly qaqtyǵysqa qatysqany týraly da aitty.
"Sot Dýjnov Qazaqstan Respýblikasynyń azamaty bola tura, eldiń Qarýly kúshterine eshqandai qatysy bolmasa da, Qazaqstannan eshqandai mamandandyrylǵan ókileti bolmai, shekarany zańsyz kesip ótti jáne shet memlekettiń aýmaǵyndaǵy qarýly qaqtyǵysqa zańsyz qatysty dep esepteidi. Osylaisha Qazaqstannyń qarýly qaqtyǵysqa aralasý qaýpin týdyrady", - dedi Erkin Maishinov.
Dýjnovtyń shet memleket aýmaǵyndaǵy qarýly qaqtyǵysqa sanaly túrde qatysqany aityldy.
Aita keteri, 2022 jyldyń 26 sáýirinde Igor Dýjnovqa qatysty sot úkimi shyqty. Ol ómir boiyna bas bostandyǵynan aiyryldy.
2021 jyldyń 20 qyrkúiegi keshke Almaty turǵyny Igor Dýjnov otbasyn úiden shyǵarýǵa kelgen adamdarǵa oq atty. Bes adam qaitys boldy: eki politsei, bir sot oryndaýshysy, úidiń jańa iesi men onyń ókili.
Kúdiktiniń otbasyna tiesili turǵyn úi onyń aldynda bankke qaryz boiynsha úshinshi tarapqa satylǵan. Úidiń burynǵy iesi sot sheshimimen kelispei, úidi bosatqysy kelmegen.
