QR Indýstriia jáne infraqurylymdyq damý ministri Beibit Atamqulov halyqty sýdy tiimdi paidalanýǵa yntalandyrýdy usyndy, dep habarlaidy QazAqparat.
«Memleket basshysy atap ótkendei, sý resýrstaryn tiimdi paidalanýymyz qajet. Osy máseleni sheshýdiń bir joly – halyqty sýdy tiimdi paidalanýǵa yntalandyrý. Qolaily ómir súrý úshin jetkilikti ońtaily tutyný normasyn aiqyndai otyryp, saralanǵan tarifterdi engizý qajet», - dedi Beibit Atamqulov Úkimettiń búgingi otyrysynda.
Ministr barlyq óńirde sý tutynýǵa keshendi taldaý júrgizip, onyń negizinde otbasyna ońtaily tutyný normasyn aiqyndaý qajettigin aitty. Bul aýyz sýmen jabdyqtaý óndirisine jáne sarqyn sýdy tazartýǵa jumsalatyn shyǵyndardy ońtailandyrýǵa múmkindik beredi.
«Memleket basshysynyń tapsyrmasyn oryndaý jergilikti jerlerdegi atqarýshy organdardyń birlesken jáne ózara kelisken jumysyna bailanysty. Ákimdikter halyqty sýmen 100 % qamtamasyz etý úshin 2023 jylǵa deiin jobalaý-smetalyq qujattamany sapaly ázirleýi jáne gidrogeologiialyq jumystardy aiaqtaýy, halqy az aýyldarda keshendi blok-modýlder ornatýdy jedeldetýi qajet», - dedi B. Atamqulov.
