Soltústik Qazaqstan oblysynda tótenshe jaǵdailar departamentiniń mamandarynan quralǵan arnaiy toptar sý basý qaýpi bar eldi mekenderge attandy, dep habarlaidy "Ult aqparat".
SQO TJD baspasóz qyzmetiniń málimetinshe, órt sóndirýshiler men qutqarýshylardan quralǵan toptar sý tasqyny kezinde jergilikti atqarýshy organdarǵa kómek kórsetedi. Mamandar ótimdiligi joǵary arnaiy avtokólikpen, motopompalarmen jáne motorly qaiyqtarmen jaraqtalǵan.
Top sý tasqyny bolǵan jaǵdaida adamdardy qutqaryp, evakýatsiialaidy, shaǵyn ózenderde muzdy kesip, jarady. Sý tasqyny jaǵdaiyn baqylap, monitoring júrgizedi.
«Departamenttiń jiyntyq jasaǵynyń bólimsheleri Ǵ.Músirepov jáne oblystyń Aiyrtaý aýdandaryna jiberildi. Olar sý basý qaýpi bar eldi mekenderdi qorǵaýdy qamtamasyz etedi. Mamandar qoiylǵan mindetti oryndap, halyqqa osy tabiǵi qubylysty zardapsyz ótkizýge pármendi kómek kórsetetinine senimdimin», - deidi SQO TJD bastyǵynyń orynbasary Murat Qanǵojinov.
Onyń aitýynsha, toptardyń quramynda 40 adam bar. Olar 8 tehnikamen, 6 motopompamen jáne 4 qaiyqpen, zamanaýi bailanys quraldarymen jabdyqtalǵan.
Qutqarýshylar Aiyrtaý aýdanynyń Gýsakovka jáne Konstantinovka aýyldarynda jáne Ǵ. Músirepov atyndaǵy aýdannyń Rýzaevka, Chistopole eldi mekenderinde ýaqytsha ornalasty. Sol jerde jeke quram sý qoimalaryn tekserip, alda atqaratyn jumystaryn josparlaýǵa kirisip ketti.
