Shyǵys Qazaqstan oblysy Borodýliha aýdanynda sý basý qaýpi seiildi, dep habarlaidy "Ult aqparat".
ShQO Tótenshe jaǵdailar departamenti baspasóz qyzmetiniń málimetine súiensek, Novopokrovka aýylynda sý deńgeii tústi. Qazirgi ýaqytta turǵyn úiler aýlalarynan qarǵyn sý ketken.
«Osyǵan deiin jer úilerden 36 adam evakýatsiialanǵan bolatyn. Barlyq azamattar týǵan-týystarynyń baspanalaryna ornalastyryldy. Jalpy, osy jumystarǵa ShQO TJD-nyń 37 qutqarýshysy, 2 tehnikasy, 1 júzý quraly jáne 4 motopompa, Semei qalasy № 68303 áskeri bóliminiń 19 áskeri qyzmetshisi, 4 tehnikasy, jergilikti atqarýshy organdardyń 30 qyzmetkeri men 15 tehnikasy jumyldyryldy. Sondai-aq qumy bar 400 dana qap tóselgen», - delingen habarlamada.
Qazirgi ýaqytta qutqarýshylar men jergilikti atqarýshy organ ókilderi aýyldaǵy jaǵdaiǵa monitoring júrgizýdi jalǵastyrýda.
