Foto: QR Parlamenti Májilisiniń baspasóz qyzmeti
Aqtóbe, Qostanai, Atyraý, Aqmola, Qaraǵandy oblystarynda sý tasqyny bastalǵannan beri 1376 úi jáne 1319 aýla aýmaǵy sý astynda qaldy, dep habarlaidy tótenshe jaǵdailar ministrligi.
Úshinshi sáýirdegi jaǵdai boiynsha, 1 345 adam, onyń ishinde 496 bala qutqaryldy jáne evakýatsiialandy.
"Sý tasqyny bastalǵannan beri 17 131 adam, onyń ishinde 6 683 bala evakýtsiialandy. 748 myń m3 erigen qar sýy soryldy, 106 myńnan astam qap jáne 156 myń tonna inertti material tóseldi. Jalpy sý tasqyny bastalǵannan beri 5,7 mln. m3 astam erigen qar sýy soryldy. 638 myńnan astam qap jáne 912 myń tonna inertti material tóseld", - deidi vedomstvodaǵylar.
Respýblikalyq, oblystyq jáne jergilikti mańyzy bar 9 avtojol arqyly sý júrdi, 18 avtojoldy sý shaidy. Jalpy 77 avtojol, onyń ishinde 4 kópir jáne 73 jol tósemin qyzyl sý shaiyp ketti. 67 eldi meken kólik qatynasynsyz qaldy.
"Qardyń tez erýine bailanysty Aqmola oblysy Jarqaiyń aýdanynyń Prigorodnoe aýylyndaǵy 8 jeke turǵyn úidi sý basty. 19 adam, onyń ishinde 2 bala jáne 1 júkti áiel evakýatsiialandy, bul rette barlyq evakýatsiialanǵandar týystarynyń úilerine bardy, sondai-aq 34 bas mal qaýipsiz jerlerge aidaldy", - deidi ministrlik.
Aqtóbe oblysy Yrǵyz aýdanynyń Qarasai aýylynda 1 jeke turǵyn úi men 2 aýla aýmaǵyn sý basty, turǵyndar aldyn ala evakýatsiialanǵan.
"Qardyń erýi men "Tereńsai" bógetiniń sýǵa tolýy saldarynan Áiteke bi aýdanynyń Aike aýylyndaǵy 2 jeke turǵyn úidi sý basty, aýyldan Júrgenev aýylyna aldyn ala 297 adam, onyń ishinde 79 bala evakýatsiialandy. Oiyl aýdanynyń 5 eldi mekenindegi jeke úilerdi sý basýyna bailanysty QR QM áýe kemelerinde Oiyl aýyly men Aqtóbe qalasyna qosymsha 85 adam, onyń ishinde 27 bala evakýatsiialandy", - deidi tótenshe jaǵdai salasynyń mamandary.
Batys Qazaqstan oblysynda Uzynkól sý qoimasynyń tolýy saldarynan Terekti aýdany Uzynkól kentin sý basý qaýpi tóndi. Osyǵan bailanysty Terekti aýdany Podstepnoe aýyly men Oral qalasyndaǵy halyq aldyn ala evakýatsiialandy: 705 adam, onyń ishinde 230 bala. Sondai-aq, Derkól jáne Shaǵan ózenderinde sý deńgeiiniń kóterilýine bailanysty Oral qalasyndaǵy Derkól kentiniń saiajai qoǵamdarynan jáne Samal aýdanyndaǵy turǵyn úiler men saiajai qoǵamdarynan turǵyndar evakýatsiialanyp jatyr.
Avariialyq-qutqarý jumystaryna TJM, QM, IIM, UQK, jergilikti atqarýshy organdardyń, uiymdardyń 12 myńnan astam adam, 2,5 myń tehnika, 801 sý aidaý quraly jáne 105 júzý quraly, 9 áýe kemesi jumyldyryldy.
