2025 jylǵa deiin stýdentter men doktoranttardyń shákirtaqysyn kezeń-kezeńmen kóterý josparlanyp otyr. Bul jaiynda Májilis depýtattarynyń saýalyna QR Premer-Ministri Asqar Maminniń jaýabynda aitylǵan, dep habarlaidy "Ult aqparat".
«Bilim alýshylardyń oqýǵa degen qyzyǵýshylyǵyn arttyrý maqsatynda memleket bilim berý granttaryn usyný, jolaqysyn óteý jáne oqýdaǵy jetistikterin eskere otyryp shákirtaqy tóleý túrinde tiisti jaǵdai jasaidy. Shákirtaqy mólsherin ulǵaitý máselesi únemi baqylaýda tur jáne biýdjet múmkindikterine bailanysty qarastyrylady. Máselen, bakalavriat stýdentteriniń ai saiynǵy memlekettik shákirtaqysynyń mólsheri 2005 jylǵy 2 913 teńgeden 2020 jyly 26 186 teńgege deiin kezeń-kezeńimen ulǵaityldy», - dedi Asqar Mamin.
Úkimet basshysynyń atap ótýinshe, 2020 jylǵy 27 mamyrda ótken Ulttyq qoǵamdyq senim keńesiniń úshinshi otyrysynda Memleket basshysy bergen tapsyrmaǵa sáikes, 2020 jyldyń 1 qyrkúieginen bastap pedagogika mamandyǵy boiynsha bakalavriat baǵǵdarlamasynda bilim alyp jatqan stýdentterdiń shákirtaqysy 26 myńnan 42 myńǵa deiin, al doktoranttardyń shákirtaqysy 150 myń teńgege deiin kóterildi.
«Jastar-Otanǵa!» baǵdarlamasyn júzege asyrý jol kartasynyń 12, 13 tarmaqtaryna sáikes, 2025 jylǵa deiin stýdentterdiń shákirtaqysyn 100 paiyz, al magistranttar men doktoranttardyń shákirtaqysy 75 paiyzǵa kezeń-kezeńimen ulǵaitý kózdelgenin atap ótken jón», - dedi Premer-Ministr.
