Ózbekstannyń Buhara qalasynda oqys oqiǵa bolyp, meditsina ýniversitetinde bilim alyp júrgen 22 jastaǵy úndistandyq stýdent qyz janjaldan keiin alǵan aýyr jaraqatynan kóz jumdy, dep habarlaidy ult.kz.
Aldyn ala málimet boiynsha, oqiǵa 3 shilde kúni bolǵan. Ekeýi arasynda týyndaǵan janjal kezinde 23 jastaǵy kýrstasy qyzdyń basynan noýtbýkpen urǵan. Zardap shekken stýdent aýyr jaǵdaida aýrýhanaǵa jetkizilgenimen, dárigerler onyń ómirin saqtap qala almady. Mamandar ólimge ishki qan ketý sebep bolǵanyn habarlady.
Qaza tapqan stýdenttiń esimi Savariia ekeni belgili. Ol Úndistannyń Kerala shtatyndaǵy Alappýja aýdanynan shyqqan jáne Buhara memlekettik meditsina institýtynda oqyǵan. Al kúdikti Sadarýl Anam da Úndistan azamaty ári sol oqý ornynda bilim alǵan. Ony Ózbekstannyń quqyq qorǵaý organdary oqiǵa bolǵan kúni-aq ustaǵan. Qazir is boiynsha tergeý amaldary júrgizilip jatyr.
Úndistandyq BAQ málimetinshe, marqumnyń denesi aldymen Niý-Delige jetkizilip, keiin týǵan jeri Kerala shtatyna jóneltilgen. Qyzdyń máiitin elge qaitarýdy onyń naǵashy aǵasy uiymdastyrǵan. Al Kýveitte jumys isteitin ákesi viza máselesine bailanysty Ózbekstanǵa bara almaǵan.
Ózbekstannyń Bas prokýratýrasy oqiǵaǵa qatysty qylmystyq is qozǵalǵanyn rastady. Tergeý barysy Buhara qalalyq ishki ister basqarmasynyń tergeý bólimi baqylaýynda.
