Qazaqstanda kreditterdiń paiyzdyq stavkasy tómendetilip, nesie tóleýge shamasy jetpeitin azamattarǵa kredit berý shekteledi. Bul týraly qarjy naryǵyn retteý jáne damytý agenttiginiń tóraǵasy Mádina Ábilqasymova málimdedi, dep habarlaidy Sputnik Qazaqstan tilshisi.
Agenttik prezidenttiń tutynýshylyq kreditti retteý tapsyrmasyn oryndaý úshin birqatar sharany júzege asyrady.
"Bankterge jáne mikroqarjy uiymdaryna qatysty táýekeli joǵary tutynýshylyq kreditter boiynsha qosymsha shekteýler engizý qarastyrylady. Nátijesinde tólem jasaý qabileti jetkiliksiz qaryz alýshylarǵa kredit berý shekteledi", - dedi Ábilqasymova Úkimet otyrysynda.
Sondai-aq úkimet ázirlep jatqan "Jeke tulǵalardyń bankrottyǵy" týraly zań jobasy aiasynda jeke tulǵalardyń bankter men mikroqarjy uiymdaryndaǵy kreditteri boiynsha, onyń ishinde kollektorlarǵa berilgen problemalyq bereshekti retteý jóninde sharalar qabyldanady.
Jeke tulǵalardyń kreditteri boiynsha paiyzdyq stavkalardy retteý kúsheitiledi.
"Ol úshin stavkalardyń shekti mánin tómendetý, sondai-aq kredit boiynsha syiaqynyń tiimdi stavkasy esebine qaryz alýshynyń kez kelgen komissiialary men tólemderin qosý kózdelip otyr. Bul jańadan beriletin kreditter boiynsha halyqtyń borysh júktemesiniń ósýin shekteidi", - dedi agenttik tóraǵasy.
12 qańtarda májiliste ótken jiynda Prezident Qasym-Jomart Toqaev halyqtyń kreditti kóp alyp jatqanyna nazar aýdardy. Tutynýshylyq kreditterdiń mólsheri biznesti kreditteý kóleminen asyp ketken. Prezident bul qarjy naryǵyn qubyltyp, áleýmettik turaqsyzdyq qaýpin týdyrýy múmkin ekenin eskertti.
Osyǵan bailanysty Memleket basshysy shekten tys qaryzdyń kóbeiýin boldyrmaý úshin Qarjy naryǵyn retteý jáne damytý agenttigine Ulttyq bankpen birlesip, prýdentsiialyq retteý tetikteri arqyly naqty ári jedel sheshim qabyldaýdy tapsyrdy.
