Soltústik Qazaqstan oblysynda litsenziiasyz kásipkerlik jáne mikroqarjylyq qyzmetpen ainalysqan turǵyn sottaldy. Tergeý barysynda onyń azamattarǵa zańsyz qaryz berýdiń 78 epizodyna qatysy bary anyqtalǵan. Qylmystyq jolmen alynǵan tabysqa satyp alynǵan 774 mln teńgeniń aktivteri memleket kirisine tárkilendi, dep habarlaidy ult.kz.
Qarjylyq monitoring agenttiginiń málimetinshe, QMA-nyń Soltústik Qazaqstan oblysy boiynsha departamenti tergeý kezinde zańsyz qaryz berýdiń 78 deregin anyqtaǵan. Qaryz alýshylardyń basym bóligi qarjyǵa muqtaj ári bankten nesie rásimdei almaǵan azamattar bolǵan.
Kúdikti qaryz berýdiń eki túrli tásilin qoldanǵan.
Birinshi jaǵdaida qaryz sharty notariýs arqyly rásimdelgenimen, mámileniń naqty talaptary qujatta kórsetilmegen. Sharttaǵy somaǵa qaryz alýshyǵa berilgen aqsha men qaryzdy paidalanǵan barlyq kezeń úshin eseptelgen paiyz qosylǵan. Qaryzdyń qaitarylýyn qamtamasyz etý úshin azamattardyń múlki kepilge qoiylǵan.
Ekinshi jaǵdaida qaryz berý faktisi satyp alý-satý sharty retinde jasyrylǵan. Múlik úshin aqsha is júzinde berilmegen, al múlik qaryzdyń kepili retinde paidalanylǵan. Qarajat qaitarylǵannan keiin shart buzylyp, múlik iesine qaitarylǵan.
Osylaisha, syrttai azamattyq-quqyqtyq mámile bolyp kóringen kelisimderdiń artynda múlikti kepilge alyp, paiyzben júieli túrde qaryz berý qyzmeti turǵan.
Tergeý nátijesinde zańsyz qyzmetten 774 mln teńge kóleminde qylmystyq tabys alynǵany anyqtaldy. Bul qarajatqa qymbat aktivter satyp alynǵan.
Sot úkimimen memleket kirisine alty páter, Toyota RAV4 avtokóligi, Kawasaki KLX250 mototsikli jáne jalpy quny 280 mln teńge bolatyn baǵaly qaǵazdar tárkilendi.
Rostovshikov E.V. 2 jylǵa bas bostandyǵyn shekteý jazasyna kesildi.
Sot úkimi ázirge zańdy kúshine engen joq.
