Ridderde 13 jastaǵy qyz qurbysymen mototsiklmen kele jatyp, joldy kóldeneń kerip turǵan arqanǵa soǵylǵan. Ol oqiǵa ornynda kóz jumdy, al 15 jastaǵy qurbysy jaraqat alyp, aýrýhanaǵa jetkizildi, dep habarlaidy «Astana» telearnasy.
Aldyn ala tergeý nusqasy boiynsha, arqan úilerdiń biriniń mańyndaǵy baǵanaǵa bailanǵan atqa bekitilgen.
Kýágerlerdiń aitýynsha, olar oqiǵa bolǵan jerge jaqyndaǵanda eki mototsikldiń ótip ketkenin kórgen. Artynsha qyzdardyń qulaǵanyn baiqaǵan. Oqiǵa ornynda er adam baǵana janynda turǵan jáne qara tústi tros ne kabelge uqsas zatty jinap jatqan.
Kýágerlerdiń biri politsiia qyzmetkerleriniń oqiǵa ornyna kelgenin, keiin ózderinen jaýap alynǵanyn aitty.
Qazir politseiler arqannyń jolǵa qalai tartylǵanyn anyqtap jatyr. Oqiǵaǵa qatysy bolýy múmkin er adam politsiiaǵa jetkizilgen. Tergeý amaldary júrgizilip jatyr.
Al zardap shekken 15 jastaǵy qyz Ridderdegi aýrýhananyń travmatologiia bóliminde em qabyldap jatyr.
Dáriger-terapevt Ardagúl Baisbaevanyń aitýynsha, qyzdyń jabyq bas-mi jaraqaty jáne jeńil dárejedegi mi shaiqalýy, bas terisi men betinde syrylǵan jaraqattary bar.
«Jaǵdaiy aýyr emes. Bala esin biledi, sóilesip jatyr. Tek psihologiialyq kúizelis alǵan. Keshe psihologqa kórsettik, tiisti kómek kórsetildi. Qazir dárigerlerdiń baqylaýynda, tolyq tekserý men qajetti meditsinalyq kómek kórsetilip jatyr», – dedi dáriger.
Mamannyń aitýynsha, qyzdyń densaýlyǵyna uzaq merzimdi áser etetin aýyr jaraqat anyqtalmaǵan. Qazir ol birtindep esin jiyp keledi.
Qaiǵyly oqiǵa bolǵan jerge jergilikti turǵyndar gúl shoqtaryn ákelip jatyr.
Buǵan deiin Ridderde 13 jastaǵy qyz motokólikpen arqanǵa soǵylyp, kóz jumǵanyn jazǵan edik.
