Qazaqstandyqtar COVID-19-ǵa qarsy «Spýtnik-V» vaktsinasy adam genomyn ózgertýge qabiletti ekendigi týraly aitylǵan videony talqylaýda. Onda reseilik telejúrgizýshi Mariia Shýkshina men professor Pavel Vorobev osyndai qorytyndyǵa keledi. Bul – ǵylymǵa qarsy.
Áigili reseilik kinoaktrisa jáne telejúrgizýshi Mariia Shýkshina COVID-19 týraly buǵan deiin de birneshe ret jalǵan aqparat taratqan edi. Ol «vaktsina áýlielerdiń bolashaqqa jasaǵan boljamynda aitylyp ketkenin» alǵa tartyp, ekpe jasatpaitynyn aitty. Sondai-aq pandemiia – bul «Resei Federatsiiasyna qarsy jariialanǵan soǵys» dep málimdegen.
Professor Pavel Vorobev te KVI pandemiiasy joq, al aýrý – «jergilikti indet» dep birneshe ret daýly oilaryn ortaǵa salǵan bolatyn.
Qazaqstandyqtar áleýmettik jelide bir-birimen bólisip jatqan videoda aktrisa men professor COVID-19-ǵa qarsy reseilik «Spýtnik-V» vaktsinasyn talqylaýda. Vorobev óz sózinde preparattyń áser etý mehanizmin sipattaidy, sodan keiin onyń adam genomyn ózgertý qabiletine ie bolýy múmkindigin aitady.
Stopfake.kz saitynyń jazýynsha, shyn máninde, bul vaktsinanyń mundai qasietteri joq jáne bolýy múmkin emes.
««Spýtnik-V» – adenovirýstyq vektor negizinde ázirlengen preparat. Ony jasaý úshin mRNQ nemese DNQ platformalary qoldanylmaǵan.
Adenovirýstyq vaktsinalar jańa shyqqan dúnie emes. Buǵan deiin «Spýtnik-V» ázirleýshileri osy tehnologiiany qoldana otyryp, Ebola bezgegine qarsy preparat jasaǵan.
Mundai vaktsinalardyń jumys isteý printsipi Sputnikvaccine.com resmi saitynda egjei-tegjeili sipattalǵan.
Sonymen qatar, «Spýtnik-V» preparaty klinikaǵa deiingi jáne klinikalyq synaqtardan sátti ótip, qaýipsizdik pen tiimdiliktiń joǵary deńgeilerin kórsetti. Vaktsina synalǵan janýarlarda da, ony qabyldaǵan eriktilerde de genomdyq ózgerister tirkelgen joq», - delingen stopfake.kz saitynda.
Aita keteiik, buǵan deiin internette matritsalyq RNQ negizinde jasalǵandyqtan Pfizer jáne Moderna vaktsinalary adamnyń DNQ ózgerte alatyndyǵy týraly jalǵan aqparat keńinen taraǵan bolatyn. Mamandar men faktchekerler bul qaýesetterdi joqqa shyǵardy.
