Sporttyq quzǵa órmeleýden Japoniianyń Hatiodzi qalasynda ótip jatqan Álem chempionatynda qazaqstandyq Rishat Haibýllin qola júldeger atandy, dep habarlaidy "Ult aqparat" Olympic.kz saityna silteme jasap.
Rishat Olimpiada litsenziiasy taratylatyn «kópsaiys» baǵdarlamasy boiynsha álemdegi úzdik úsh sportshynyń qataryna enip otyr. Kópsaiys qataryna boýldering, jyldamdyq jáne qiyndyq boiynsha jarysý engen.
«Jyldamdyq» boiynsha Rishat eń úzdik nátije kórsetip, birinshi orynnan kórindi. Ol 5.915 sekýndta berilgen qashyqtyqty júrip ótip, álem rekordyn jańartýǵa bir qadam jaqyndady.
«Boýldering» boiynsha Haibýllin segizinshi oryn alsa, eń sheshýshi kezeń sanalatyn «qiyndyqta» besinshi orynnan kórindi.
Jarys nátijesinde úsh kezeńdegi upailar eseptelip, jeńimpazdar men júldegerler anyqtalǵan.
Rishat Haibýllin Olimpiada litsenziiasymen birge álemdik synnyń qola júldesin ielenip otyr. Altyn medaldi Japoniia ókili Tomoa Narasaki, kúmis júldeni avstriialyq Iakýb Shýbert ielendi.
Aita keteiik, buǵan deiin sporttyq quzǵa órmeleýden Qazaqstan sportshylary álem birinshiliginen júlde almaǵan. Sondai-aq, Rishat - atalǵan Álem chempionatynyń finalynda óner kórsetken TMD elderiniń jalǵyz ókili.
