Qazaqstandyq ziltemirshi, Álemniń tórt dúrkin chempiony Ilia Ilin 2018 jylǵy Qazaqstan chempionatynyń jeńimpazy atandy, dep habarlaidy "Ult aqparat".
Ilin 102 kelige deiingi salmaq dárejesinde Taldyqorǵanda ótken el birinshiliginiń úzdigi atanyp otyr. Sportshy jańa salmaq dárejesinde 172+208 keli ziltemirlerdi julqi kóterýden Álisher Orazbek pen Eldar Sembaevty artqa tastap, eń joǵary nátije kórsetti.
Eske salaiyq, Bul Ilinniń 2015 jyldyń jeltoqsanynan beri qatysyp otyrǵan alǵashqy jarysy. Sol jyldyń sońynda Halyqaralyq olimpiada komiteti (HOK) 2008 jylǵy Pekin jáne 2012 jylǵy London olimpiada oiyndarynyń synamalaryn qaita teksergen. HOK Ilinniń osy eki olimpiadadaǵy analizderinen doping tabylǵanyn habarlap, eki altyn medalin qaitaryp alǵan. Keiin Halyqaralyq aýyr atletika federatsiiasy (IWF) Ilindi eki jylǵa sporttan shettetken.
Ilin tek Olimpiadada utqan medaldarynan aiyrylǵan, al ózge júldeleri – 2005, 2006, 2011 jáne 2014 jyldardaǵy álem chempionattarynyń tórt altyny men Aziia oiyndarynda 2006 jáne 2010 jyldary alǵan eki altynyn saqtap qalǵan.
Sportshynyń aitýynsha, ol aldaǵy 2020 jylǵy Olimpiadada «altyn» úshin synǵa túspek.
