Shyǵys Qazaqstan oblysynda Sport jáne dene shynyqtyrý isteri komitetiniń burynǵy qyzmetkerleri sottaldy, dep habarlaidy "Ult aqparat".
ShQO Qylmystyq ister jónindegi mamandandyrylǵan aýdanaralyq soty baspasóz qyzmetiniń málimetinshe, iri kólemde para alǵan Sport jáne dene shynyqtyrý isteri komitetiniń burynǵy basshysy «X», aýyr zardaptarǵa ákep soqqan qyzmet babyn asyra paidalanǵany úshin komitet basshysynyń eks-orynbasary «O» jáne JShS-niń alaiaqtyq jasaǵan burynǵy direktory «B» sottaldy.
«Belgili bolǵandai, komitet orynbasary «O» men JShS direktory «B» aldyn ala sóz bailasyp, 354 112 947 teńge mólsherinde biýdjet qarajatyn jymqyrǵan. Bul qarjy negizinen Ridder qalasynda 300 oryndyq respýblikalyq mamandandyrylǵan olimpiadalyq rezerv mektep-internat-kolledjin salýǵa bólingen», - delingen aqparatta.
Al Sport jáne dene shynyqtyrý isteri komitetiniń eks-basshysy «X» 2018 jyldyń mamyry men jeltoqsan ailary aralyǵynda JShS direktory «B-dan» 35 013 881 teńge kóleminde para jáne quny 13 000 000 teńgelik avtokólik alǵan. Ol kólikti áieliniń atyna aýdaryp jibergen.
«Sot isi barysynda «O» jáne «B» óz kinálaryn moiyndady. Al «H» para almaǵanyn alǵa tartqan. Alaida aiyptalýshylardyń kinási kýágerlerdiń aitqandarymen jáne tiisti qujattarmen dáleldendi», - delingen habarlamada.
Sot úkimi boiynsha Sport jáne dene shynyqtyrý isteri komitetiniń burynǵy basshysy «X» QR Qylmystyq Kodeksiniń 366-baby 2-bóligimen 5 jylǵa, komitet basshysynyń eks-orynbasary «O» QK-niń 361-baby 4-bóliginiń 2-tarmaǵymen 3 jylǵa jáne JShS-niń osyǵan deiin sotty bolǵan burynǵy direktory «B» 7 jylǵa bas bostandyqtarynan aiyryldy. Sondai-aq olar memlekettik qyzmette jumys isteý quqyǵyn ómir boiyna joǵaltty. Úkim áli zańdy kúshine engen joq.
