Atyraý oblysynda mektep oqýshysyn joǵary synyptyń birneshe balasy aiaýsyz uryp tastaǵan. Saý-tamtyǵy qalmaǵan 15 jastaǵy bala qazir aýrýhanada jatyr. Keleńsizdik oblys ortalyǵynan 200 shaqyrym qashyqtaǵy Isatai eldi mekeninde bolǵan. Alaqandai aýyldaǵy qatygezdikke ne sebep boldy? Bul - mektep oqýshylary arasyndaǵy álimjettik pe? Bul týraly Astana telearnasynyń siýjetinde aityldy, - dep habarlaidy Tengrinews.kz.
Baýyr eti balasynyń saý-tamtyǵy qalmaǵan denesin kórgen anasy ózin qoiarǵa jer tabar emes. Jasóspirim "fýtbol oinap júrip, qulap qaldym" dep, bolǵan jaitty anasynan alǵashynda jasyrǵan. Anasy onyń soqqyǵa jyǵylǵanyn, aiaǵyn basa almai qalǵan kezde bir-aq bilgen. Dereý politsiiaǵa shaǵymdanyp, oqýshyny dárigerler birden oblys ortalyǵyna alyp ketken. Aq halattylar naýqastyń aýrýhanaǵa túskendegi jaǵdaiy aýyr bolǵanyn aitady.
"Soǵyp, qol jaǵyn, aiaǵyn isirip qoiǵan, bóteke jaǵyn soqqan, keýdesin soqqan balalar. Túskende bári isik boldy. Diagnozy - oń iyqtyń, jambastyń jáne keýdeniń jumsaq tinderiniń kógerýi. Qazir balanyń jaǵdaiy jaqsaryp keledi", - dedi Atyraý oblystyq balalar aýrýhanasy hirýrgiia bólimshesiniń meńgerýshisi Gúlmira Merǵazieva.
Ulynyń densaýlyǵyna alań anasy, mektep basshylyǵynyń beiqamdyǵyna ashýly. Gúlzada Musaǵalievanyń aitýynsha, bilim oshaǵy 9-synyp oqýshylarynyń álimjettik jasap júrgenin bile tura kóz juma qaraǵan. Ol mektep ujymynyń jaǵdaiǵa jeńil-jelpi qaraǵany úshin jazalaýdy talap etti.
Mektep basshylyǵynyń aitýynsha, oqiǵa sabaqtan tys ýaqytta bolǵan. 9-synyp oqýshylary aldymen synyptasynyń úiine jinalypty. Soqqyǵa jyǵylǵan 8-synyp oqýshysy da kóbine osy balalarmen birge júretin dedi.
"Balalarmen sóilesip jatyrmyz. "Sózinde turmaidy. Ýádesinde turmaidy. Aitqan sózinen taiqidy. Sol sebepti urdyq", - deidi. Meniń qolymdaǵy málimet boiynsha, 9 bala jańaǵynyń ishinde bolǵan. Qarap turǵany bar. Urǵany bar. Biraq úiine ketkennen keiin de ata-ana qaraý kerek qoi", - dedi Isatai orta mektebiniń direktory Aigúl Ádilova.
Qazir bolǵan oqiǵaǵa qatysty Qylmystyq kodekstiń "Densaýlyqqa qasaqana aýyrlyǵy ortasha ziian keltirý" babymen is qozǵaldy. Aýdandyq politsiia bólimi tergeýdi bastap ketti.
"2007 jylǵy jasóspirim oqýshynyń taiaq jegeni, soǵylǵany týraly ata-anasy politsiiaǵa aryzdandy. Atalǵan derek boiynsha kúdikti retinde sol mekteptiń 9-synyp oqityn eki oqýshysy anyqtaldy. Qylmys boiynsha QK 107-babymen sotqa deiingi tergeý amaldary bastaldy. Qajetti saraptamalar taǵaiyndaldy", - dedi Atyraý oblystyq politsiia departamentiniń baspasóz hatshysy Meiirim Erdáýlet.
Politsiia ázirge kúdikti retinde eki oqýshyny atap otyr. Al qasynda bolǵan ózge jasóspirimderdiń qylmysqa qatysy bar-joǵyn tergeý anyqtaidy. Olardyń kinási dáleldense, ata-analaryna eki myń ailyq eseptik kórsetkishke deiingi mólsherde aiyppul salynbaq. Nemese úsh jylǵa deiingi merzimge bas bostandyǵynan aiyrý jazasy kózdelgen.
