Túrkistan oblysy, Sozaq aýdany ortalyǵynan shalǵaida ornalasqan Shý aýylynyń 60 jyldyq mereitoiy igi istermen órnekteldi. Shý aýylynyń ortalyq alańynda Ekinshi dúniejúzilik soǵysyna qatysýshy ardagerler jáne batyr analardyń esimi jazylǵan qurmet taqtaishasynyń lentasy qiyldy. Mereitoiǵa arnaiy qatysqan aýdan basshysy Muhit Turysbekov, aýyl turǵyndary men qonaqtaryn quttyqtady.
«Qoinaýy qazynaǵa toly, tarihy tereń kieli Sozaq aýdanynyń irgeli aýyldarynyń biri – Shý aýyl okrýgi. Ózindik qalyptasqan tarihy bar Shý aýyly biyl 60 jyldyq mereitoiyn atap ótýde. Búginde elimizdiń damýyna eńbek sińirip júrgen ǵalymdar – Túktibai Tasmaǵanbetov, Sáýle Musaeva qazaq án óneriniń juldyzdary – Sáken Maiǵaziev pen Kenjebek Jánábilovty dúniege ákelgen qutty meken. Berekesi men birligi jarasqan aýyl táýelsizdik jyldary da damyp, kóptegen áleýmettik nysandar salyndy. Jańa mektep, balabaqsha, meshit pen joldar tóselip, kóshe jaryqtandyryldy. Mine, munyń bári egemendik alǵaly halyq igiligine berilgen dúnieler. Aýyldy boilai ótetin Shý ózenin jergilikti halyq tiimdi paidalanyp otyr. Ózen boiynan qystyq mal azyǵyn jinap, jazda óris qylyp, ata-babadan qalǵan mal sharýashylyǵyn damytyp keledi. Aldaǵy ýaqytta da Shýdyń tekti jurty aýdannyń damýyna úlken úles qosa beredi», – dedi aýdan basshysy Muhit Turysbekov.
Aýdandyq máslihat hatshysy Begimbet Baiǵaraev, Túrkistan oblysynyń bas imamy Erkebulan Qaraqulov ta aýyl turǵyndaryna degen ystyq yqylasyn bildirdi. Aýyldyń damýyna eńbek sińirgen ardagerler men azamattarǵa aýdan ákimdigi men aýdandyq máslihattyń alǵys haty tabys etildi. Shý aýylynyń týmasy metsenat Áljanov Erǵali Tólegenulyna aýyldastary ardaqtap at mingizdi.
Mereitoiǵa kelgen qonaqtar kúrdeli jóndeýden ótip, qaita paidalanýǵa berilgen «Borsabai» meshitinde juma namazyn oqydy.
Saltanatty sharada sporttyq básekeler ótti. Qazaq kúresinen tarazdyq Mergenbai Baqbergen «túie balýan» atanyp, júldege tigilgen ógizdi aldy. Ekinshi oryndy Sozaq aýdanynyń balýany Dosybaev Dáýlet ielenip, qoshqardy qanjyǵaǵa bailady. Gir tasyn kóterýden Qobylandy Orynbasar bas júldeni ielendi. Qoshqar kóterýden arystyq Azamat Maqulbekov bas júldeni aldy. Sondai-aq báige, kókpar básekesi de ótip, ulttyq sport ulyqtaldy. Jarys jeńimpazdary men júldeli oryn ieleri qomaqty syilyqtarmen marapattaldy.
Shýdaǵy dýman qazaq estrada juldyzdary qatysqan kontserttik baǵdarlamaǵa ulasty. Týǵan aýylyna ánnen tartý jasaǵan Sáken Maiǵaziev pen Kenjebek Janábilov, Jubanysh Jeksenuly sonymen qatar, Zattybek Kópbosynuly, Marat Imashev, Narkenje Serikbaeva, Ernar Aidar, «Dieta KZ» toby jáne ózge de ánshiler mereke kórkin kirgizdi.
