"Uly dalanyń jeti qyry jáne qazaq ádebieti". Jazýshylar odaǵynyń I plenýmynda Nursultan Nazarbaevtyń tarihi sanany jańǵyrtý jónindegi maqalasy talqylandy. Plenýmda keler jyly aqyn-jazýshylardyń óz teatry ashylyp, tolyq aýdioantologiiasy jasalatyny da aityldy, dep habarlaidy "Ult aqparat".
Qazaqstan Jazýshylar odaǵynyń basqarma tóraǵasy Ulyqbek Esdáýlet jiyndy ashyp, maqalanyń mańyzyna toqtaldy.
«Prezidenttiń “Uly dalanyń jeti qyry” maqalasy tarihymyz pen mádenietimizdiń qadir-qasietin tanytty. Maqalanyń mán-mańyzy men quny áli talqylanyp, tiisti jobalar da qolǵa alynyp jatyr. Búgingi basqosýda aldymen osy maqalanyń eń basty baǵyttaryn anyqtap alýymyz qajet. Óitkeni biz otarshyldyqtyń qiyn-qystaý kezinen shyqsaq ta, óz tarihymyzǵa qol jetkize almai, zárý bolyp keldik», – dedi ol.
Sonymen qatar, plenýmda odaqtyń biyl atqarǵan jumysy qorytyndylanyp, keler jylǵy jospary talqylandy. Ulyqbek Esdáýlettiń aitýynsha, Jazýshylar odaǵynyń Ádebietshiler úiinde “Sóz patshasy” atty poetikalyq teatr qurylmaq. Jańa teatrdyń kórkemdik jetekshisi Ǵ.Músirepov atyndaǵy jastar men jasóspirimder teatrynyń rejissery Beibit Kamaranov bolady.
«Teatr 2019 jyldyń basynda aqyn, Halyqaralyq «Alash» ádebi syilyǵynyń iegeri Baqyt Bedelhannyń aqyn Ámirhan Balqybektiń rýhyna baǵyshtalǵan «Qasqyr qudai bolǵan kez» atty poetikalyq dramasymen ashylady. Eki aida bir shyǵarma sahnalanatyn bolady. Aldaǵy ýaqytta teatrdyń repertýary ózge de qalamgerlerdiń shyǵarmalarymen tolyǵyp otyrmaq», - dedi ol.
Alqaly jiyn barysynda Ulyqbek Esdáýlet Qazaqstan Jazýshylar odaǵy tuńǵysh ret «Aziia elderi qalamgerleriniń I forýmy» atty halyqaralyq konferentsiia uiymdastyrǵaly otyrǵandyǵyn da aityp ótti.
«Bizdiń osy bir asa iri jobamyz joǵarǵy jaqtan qoldaý taýyp, 2019 jyldyń biýdjetine engizilgeni jóninde vitse-ministr Aqtoty Raiymqulovadan qýanyshty hat aldyq. Bul, shyn máninde, 1973 jyly Almatyda ótken Aziia-Afrika jazýshylarynyń 5-konferentsiiasynan keiingi orasan bas qosý bolmaq. Forým arqyly jańa zamanǵy qazaqstandyq mádeniettiń álem halyqtaryna keńinen nasihattalýyna, rýhani keńistigimiz ben bai ádebietimizdiń jan-jaqty tanystyrylýyna jaǵdai jasai otyryp, búkil Aziia ádebietiniń bolashaǵyna qatysty kúrdeli máselelerdi birlesip sheshý jóninde alǵash bolyp bastama kótergen memleket retinde Qazaqstannyń halyqaralyq imidjiniń ósýine yqpal etýimiz kerek», - dedi ol.
Jazýshylar odaǵynyń basqarma tóraǵasy “MýzART” stýdiiasynda jasaqtalatyn aýdioantologiiany jazý jumysy bastalǵanyn jáne jańa jylda jalǵasyn tabatynyn aitty.
«Bul - Qazaqstan Jazýshylar odaǵy men «MýzART» stýdiiasy arasyndaǵy jasalǵan kelisim boiynsha barlyq aqyndar men prozaikterge berilgen tegin múmkindik. Aqyn óleńin, prozaikter men dramatýrgter óz shyǵarmalaryn oqyp, tarihqa daýystaryn qaldyrady», - dedi tóraǵa.
Basqarma tóraǵasynyń aitýynsha, 2019 jyly Qazaqstan Jazýshylar odaǵynyń janynan saraptamalyq jumys toby qurylmaq.
«Qazaqstan Respýblikasy Bilim jáne ǵylym ministrligine barlyq oqýshylarǵa arnalǵan ádebi oqýlyqtarǵa saraptama jasap, oqýlyqtardy Jazýshylar odaǵynyń maquldaýynan keiin ǵana bekititý týraly usynys daiyndap otyrmyz. Sondai-aq, Qazaqstan Jazýshylar odaǵy janynan án mátinderin qadaǵalaityn «Kórkemdik keńes» qurylady. «Kórkemdik keńes» ánniń estisin elep, essizin elekten ótkizip, qazaq rýhaniiatynyń tamyryna qan júgirtip, ulttyq ideologiiamyzdyń jańasha jańǵyrýyndaǵy ustynymyzdy ustap qalýdy kózdeidi», - dedi ol.
Jiyn barysynda Ulyqbek Esdáýlet tóraǵalyq mindetke kelgen 9 aidyń ishinde Úkimet, jergilikti uiymdar men jalpy halyqtyń Qazaqstan Jazýshylar odaǵyna degen kózqarasy men pikirin ózgerte alǵandyqtaryn aita kele, aldaǵy ýaqytta da atqarylar sharýalar shash etekten ekenin jetkizdi.
«Eń mańyzdy isterdiń qatarynda Qazaqstan Jazýshylar odaǵynyń 85 jyldyq mereitoiy tur. Osyǵan orai, biyl Qazaqstan Respýblikasynyń Premer-Ministri Baqytjan Ábdiruly Saǵyntaevtyń qabyldaýynda bolyp, 2019 jyly Qazaqstan Jazýshylar odaǵynyń ǵimaratyna kúrdeli jóndeý jumystaryn júrgizýge jáne osy Ádebietshiler úiiniń zamanaýi úlgide jabdyqtalýyna bailanysty kelisimin alyp qaittyq. Ol kisi tiisti oryndarǵa tapsyrma berdi. Qazaqstan Jazýshylar odaǵynyń 85 jyldyq mereitoiy qalamgerlermen qatar barsha halyqtyń jappai toilaityn torqaly toiy dep bilemin. Sonymen qatar, «Qazaq ádebieti» gazetiniń de mereitoiy. Bul ortaq mereitoiǵa jáne rýhani ómirimizge tyń serpin berer qanshama irgeli sharýalarǵa osy otyrǵan barlyǵyńyz da bir kisidei atsalysasyzdar degen senimdemin», - dedi ol.
