2023 jyly sottalǵandarǵa meditsinalyq qyzmet kórsetý Densaýlyq saqtaý ministrligine beriledi. Bul týraly QR Ishki ister ministrliginiń resmi ókili Nurdildá Oraz málim etti, dep habarlaidy QazAqparat.
Onyń atap ótýinshe, Ishki ister ministrliginde vedomstvo qyzmetin jetildirý máseleleri boiynsha ashyq onlain tyńdaýlar ótti. Onda qylmystyq-atqarý júiesin jetildirýge baǵyttalǵan zańnamaǵa engiziletin túzetýler qaraldy.
«Ózekti máselelerdiń biri - sottalǵan adamdardy meditsinalyq qamtamasyz etý. Kórsetiletin meditsinalyq kómektiń sapasyn arttyrý jáne halyqaralyq standarttarǵa sáikestendirý maqsatynda 2023 jylǵa qarai sottalǵandardy meditsinalyq qamtamasyz etýdiń barlyq fýnktsiialary Densaýlyq saqtaý ministrligine beriletin bolady. Bul is-shara sottalǵandardy meditsinalyq tekserýdiń, diagnostikanyń jáne emdeýdiń qazirgi zamanǵy ádisterin paidalanýǵa múmkindik beredi», - dedi Nurdildá Oraz.
Sonymen qatar, ol meditsina qyzmetkerleri ashtyq jariialaýdy tirkeý nemese dene jaraqatyn salýǵa qatysty sheshim qabyldaǵan kezde olardyń jumysyna mekeme ákimshiliginiń aralasý múmkindigi joiylatyndyǵyn aitty.
«Ashyq tyńdaý barysynda probatsiia qyzmetiniń esebinde turǵan adamdardyń áleýmettik-quqyqtyq kómek alýyna járdem kórsetý máselesi de qaraldy. Bul fýnktsiia jergilikti atqarýshy organdarǵa beriletin bolady. Óitkeni zańnamaǵa sáikes ákimdikter qazirdiń ózinde osy baǵytta kómek kórsetip keledi», - dedi resmi ókil.
Eske salaiyq, 2 maýsymda QR IIM-de «QR keibir zańnamalyq aktilerine ishki ister organdarynyń qyzmetin jetildirý máseleleri boiynsha ózgerister men tolyqtyrýlar engizý týraly» zań jobasynyń negizgi erejelerin túsindirý jáne talqylaý boiynsha jariia onlain-tyńdaý ótti. Onda Ishki ister ministriniń orynbasary Aleksei Kalaichi QR IIM Qylmystyq-atqarý júiesi komiteti sottalǵandarǵa meditsinalyq qyzmet kórsetý fýnktsiiasyn QR Densaýlyq saqtaý ministrligine beretinin málim etken edi.
