Sot saraptamasy organdarynyń materialdyq-tehnikalyq bazasy 70 paiyzǵa jańartyldy. Bul týraly QR Ádilet ministri Marat Beketaev aitty, dep habarlaidy QazAqparat.
«Sot saraptamasy organdarynyń materialdyq-tehnikalyq bazasy 70 paiyzǵa jańartyldy. Jańa zamanaýi fýnktsionaldyq zerthanalyq aspaptar men jabdyqtar satyp alyndy. Tozý normalaryna sáikes kompiýterlik jáne ofistik tehnika jańartylýda», - dedi ministr Ortalyq kommýnikatsiialar qyzmetindegi baspasóz máslihatynda.
Onyń atap ótýinshe, Nur-Sultan qalasynda Sot saraptamalary institýtynyń úlgilik ǵimaratynyń qurylysy júrgizilýde.
«2021-2025 jyldary respýblikanyń taǵy 6 óńirinde ǵimarattar salý josparlanýda», - dedi Marat Beketaev.
Sonymen qatar ol «E-Saraptama» aqparattyq júiesi ázirlengenin atap ótti.
«Ony «Tórelik», «E-qylmystyq is» jáne «E-litsenziialaý» aqparattyq júielerimen shoǵyrlandyrý boiynsha jumys júrgizildi. Biyl ónerkásiptik paidalanýǵa qosý jáne ony taratý josparlanýda», - dedi ol.
